Եվրոպայի հայկական միությունների ֆորումի նախագահ Աշոտ Գրիգորյանն այսօր լրագրողների հետ հանդիպման ընթացքում հայտարարեց, որ ԵՀՄՖ-ն 2013 թվականը հայտարարել է Հայոց ցեղասպանության միջազգային ճանաչման պայքարի տարի, և այդ ուղղությամբ աշխատանքները սկսվել են դեռևս հունվարից:
Ա. Գրիգորյանը ներկայացրեց իր դստեր հեղինակած «Մշակութային ցեղասպանություն» գիրքը և կարծիք հատնեց, որ չի կարող լինել ցեղասպանություն, եթե առաջնահերթ չվերացվի այդ ազգի մշակույթը. «Այս գրքի մեջ հիանալի է ներկայացված Ջուղայի խաչքարերի առանձնահատուկ լինելը: Ես չգիտեի, որ դրանք ունեն այսպիսի նշանակություն։ Եռաչափ խաչքարերը պատրաստվել են Ջուղայի արվեստագործների կողմից, և իմ կարծիքով դրանց վերացումն ավելին է, քան սովորական հանցագործությունը:
Բոլոր տեսակի ցեղասպանությունները սկսում և ավարտվում են մշակութային ցեղասպանության միջոցով. եթե կատարվի ցեղասպանություն և մշակույթը չվերցնես, անընդհատ էթնիկ խումբը ապրելու է և ապացուցի, որ ապրել է այդ հողի վրա»,- ասաց նա:
Ա. Գրիգորյանը նաև նշեց, որ Սլովակիան առաջին և միակ երկիրն է, որն ընդունել է Ցեղասպանության ժխտումը քրեականացնող օրենք, իսկ Հայաստանի արտգործնախարար Էդվարդ Նալբանդյանը երբեք այդ մասին չի հիշատակում. «Ասեմ՝ թուրքերը իրենց համար ճիշտ ճանապարհ են ընտրել և չեն խոսում այդ օրենքի մասին, իսկ Ադրբեջանը հիմարաբար պայքարում է այդ օրենքի դեմ և օգնում մեզ։ Նա ֆանտաստիկ օգնեց մեզ, երբ թույլ չտվեց, որ հայ-թուրքական արձանագրությունները ստորագրվեն:
Հայաստանի արտգործնախարար Էդվարդ Նալբանդյանը, ոչ միայն ոչ մի տեղ Ֆրանսիայում ընդունվելիք այդ օրենքի նախագծի և թուրքական կողմից ճնշումների մասին չի խոսում, այլ նաև Սլովակիայի։ Եվ դուրս է գալիս, որ Սլովակիան շատ ավելի է անում Հայաստնի համար, քան նա: Մենք անընդհատ մեր ելույթներում հարցով դիմում ենք Է. Նալբանդյանին՝ նա Հայ դատի կո՞ղմ է աշխատում, թե Հայ դատի՝ դեմ, մեր ազգի պատմությա՞ն կողմ է, թե» հանուն իր որոշակի շահերի է գործում»:
Բանախոսն անդրադարձավ նաև մեկ այլ խնդրի՝ իրենց կողմից նախաձեռնած՝ Հայաստանում պրոֆեսիոնալ ֆուտբոլիստների ասոցիացիայի ստեղծմանը, և նշեց, որ իրենց այդ նախագիծը չի իրագործվել ՀՖՖ նախագահ Ռուբեն Հայրապետյանի պատճառով. «Մեզ մերժեցին, հետո պարզվեց, որ նա իր նախագահությամբ է նման բան ստեղծել։ Արդարադատության նախարարությունն առաջարկեց մեզ այլ անվանմամբ ստեղծել, ասենք՝ Հայկական ֆուտբոլային ասոցիացիա, բայց Նեմեց Ռուբոյի «շնորհիվ» դա էլ չկարողացանք իրագործել, որովհետև ԱՆ-ի միջոցով նա դա էլ կասեցրեց»:
Լուսանկարը՝ PanARMENIAN Photo-ի
