Օրերս Կովկասի մահմեդականների վարչության նախագահ Շեյխ ուլ Իսլամ Ալլահշուքյուր Փաշազադեն, անդրադառնալով Նարդարանի դեպքերին, ըստ APA գործակալության, մասնավորապես նշել էր, որ այդ իրադարձությունների արմատները տանում են արտերկիր: Նա հավանական էր նկատել, որ Հայաստանը «կցանկանար անկարգություններ կազմակերպել» այնտեղ, և հավելել էր, որ ձերբակալվածների մարմինների դաջվածքները հայկական խորհրդանիշեր են պարունակում:
Ադրբեջանի հոգևոր առաջնորդի կատարած հայտարարության առնչությամբ «Առաջին լրատվական»-ի դիմումին ի պատասխան՝ Ամենայն Հայոց կաթողիկոսի մամլո խոսնակ Տ. Վահրամ քահանա Մելիքյանն ասաց. «Զարմանքով ընթերցեցինք Հայաստանի և հայերի մասին Ալլահշուքյուր Փաշազադեի կատարած հերթական հայտարարությունը: Առաջին անգամ չէ, որ ականատեսն ենք դառնում նրա նման պահվածքի:
Դատապարտելի է, որ հոգևոր առաջնորդն իր երկրում ստեղծված անհանդուրժողական մթնոլորտի հետևանքով տեղի ունեցող իրադարձությունները նկատում է հրահրված Հայաստանի և հայերի կողմից` Հայաստանը հռչակելով որպես թշնամի երկիր:
Հոգևոր առաջնորդի դատողությունները բնավ համահունչ չեն տարածաշրջանի հոգևոր առաջնորդների հանդիպումների ոգուն, որոնք նպատակ են հետապնդում հաշտության և համերաշխության ոգի ձևավորել ու վստահության մթնոլորտ կերտել և ոչ թե թշնամություն ու ատելություն սերմանել ժողովուրդների միջև»:
Մամլո խոսնակը նշեց նաև, որ նման հայտարարություններով փորձ է արվում խաթարել առկա հակամարտության խաղաղ կարգավորմանն ուղղված ջանքերը:
