Ինչպես այսօր պարզվեց՝ ԱԺ-ում Բյուջե 2016-ի քննարկման ժամանակ, Կառավարությունը մերժել է պատգամավորների 450 բյուջետային առաջարկների մեծ մասը: Այդ առաջարկները հիմնականում վերաբերում էին նրանց ընտրատարածքների քաղաքների և գյուղական վայրերի ճանապարհների, դպրոցների ու մսուր-մանկապարտեզների տանիքների վերանորոգմանը: Դրանք մեծամասամբ մերժվել են՝ հիմնավորմամբ, որ կանխատեսվող բյուջետային մուտքերի մակարդակը ցածր է լինելու:
Հանրապետական պատգամավոր Մուրադ Մուրադյանը խիստ բարկացել էր, որ Կառավարությունը մերժել է իր առաջարկների 99 տոկոսը: Փոխարենը, ինչպես ասաց ԲՀԿ խմբակցության պատգամավոր Միքայել Մելքումյանը, Կառավարությունն ընդունել է ԲՀԿ բյուջետային առաջարկների 70-75 տոկոսը՝ ստանալով ԲՀԿ աջակցությունը բյուջեին կողմ դիրքորոշման տեսքով:
ԲՀԿ-ում չեն թաքցնում, որ հենց այդ պատճառով են կողմ քվեարկում բյուջեին, չնայած որ նախորդ տարի ԲՀԿ-ն խիստ դեմ էր բյուջեին, այն պարագայում, երբ անցյալ տարվա բյուջեն ավելի լավն էր: ԲՀԿ պատգամավոր Վահան Բաբայանը մեզ հետ զրույցում հերքեց տեղեկությունները, թե վերջին շրջանում ԲՀԿ-ն ֆինանսավորում է Հովիկ Աբրահամյանը, և դրա պատճառով ԲՀԿ-ն չի կարող դեմ քվերակել բյուջեին:
Դաշնակցությունը կողմ չէ բյուջեին, սակայն դեմ չի քվեարկի: Կառավարությունը մերժել է Դաշնակցության առաջարկների մեծ մասը՝ ընդունելով միայն 2-ը: ՀՅԴ-ում չեն ուզում հավատալ, որ Կառավարությունը կողմնակալ որոշում է կայացրել:
Կարելի է նկատել, որ Կառավարությունը մեծամասամբ ընդունել է ՀՀԿ-ական պատգամավորների առաջարկները: Ֆինանսների փոխնախարար Պավել Սաֆարյանը չի թաքցնում, որ իրենք գերադասում են ընտրել նրանց, ովքեր հավատում են բյուջեին:
Կան պատգամավորներ, որոնց առաջարկներն ընդունվել են խանդավառությամբ:
Օրինակ՝ Կառավարությունն ընդունել է ՀՀԿ-ական պատգամավոր Կորյուն Նահապետյանի առաջարկը և պատգամավորի խնդրածից 3 անգամ շատ գումար տրամադրել:
Մանրամասները դիտեք տեսանյութում:
