“Да ну его”,- այսպես արձագանքեց Հրանտ Բագրատյանը լրագրողի այն հարցին, թե ինչպես է գնահատում ՀՀ վարչապետ Տիգրան Սարգսյանի երեկվա ելույթը փոքր ու միջին բիզնեսի վերաբերյալ, որտեղ վարչապետը խոսել էր միջին խավի ձևավորման և օլիգոպոլ համակարգի մասին:
«Չի կարելի նստել այդպիսի անտեղի բաներ ասել: Արտերի 70%-ը վարած չէ: Ես ուսանողներ ունեմ, թեկուզ այստեղ Երևանում, որոնք մի երեք անգամ ավելի խելոք դատողություններ կանեն այդ խնդիրների վերաբերյալ»,- ասաց Հ. Բագրատյանը:
Նրա խոսքով, կառավարությունն այսօր «ցուգցվանգի մեջ է հայտնվել` Տիգրան Սարգսյանի նախորդ 3 տարիների սխալների պատճառով»: «Որպեսզի բյուջեն կատարեն, պետք է ինֆլյացիան ավելի բարձր լինի` 10-15% և ավելի: Այդ դեպքում բյուջեն հեշտ է կատարելը` գները թանկանում են, հարկերն ավելանում են: Բայց դա անվանական բյուջեն է, ոչ թե իրականը: Մյուս կողմից էլ` եթե պայքարում են ինֆլյացիայի դեմ` ցածրացնում են ինֆլյացիան, խնդիր են ունենում բյուջեն կատարելու առումով: Այս տարի կուրսը, ի տարբերություն նախորդ տարվա, խնդիր չի լինի»,- նշեց Հ. Բագրատյանը` հավելելով, որ դրամի կուրսի նկատմամբ վարված քաղաքականությունը ևս սխալ էր, քանի որ թվով 81 երկրների վերջին 5 տարվա վիճակագրությունը ցույց է տալիս, որ «բոլոր այն երկրները, որտեղ տեղի է ունեցել ազգային արժույթի արժևորում դոլարի նկատմամբ, բացառությամբ Շվեդիայի, ունեն տնտեսության կա՛մ լճացում, կա՛մ անկում»:
«Հիմա կուրսը արդեն խնդիր չէ: Իրենք պետք է կա՛մ ընտրեն բյուջեն կատարելը, ինչը նաև աշխատավարձն ու թոշակն է, կա՛մ էլ ինֆլյացիան զսպելը: Հնարավոր է, որ ինֆլյացիան իջեցնեն` վերաֆինանսավորման տոկոսադրույքը 8.5%-ից 10.5% դարձնելով, դրամի զանգվածը կրճատելով: Գնաճի խնդիրը, ընդհանրապես, կարելի է լուծել կա՛մ ապրանքների և ծառայությունների քանակը ավելացնելով` տնտեսական աճ ապահովելով (այս դեպքում գները կիջնեն), կա՛մ փողի քանակը քչացնելով, ինչը անում է այսօր ԿԲ-ն: Սա ամենաէժանագին, անմարդկային ձևն է, նշանակում է` փողի գենոցիդ: Իրենք, իհարկե, այս երկրորդը կշարունակեն անել, որովհետև ա. առաջինն անելու համար ո՛չ խելք ունեն, ո՛չ համարձակություն, ո՛չ էլ քաղաքական կամք, բ. առաջինը անողները իրենք չեն լինի:
Գնաճը` որպես թարգեթ (նպատակ.-1in.am) կզսպեն, բայց կնայեն բյուջեի եկամուտներին` եթե դրանք հարաբերականորեն պակասում են (իսկ դրանք պակասում են), առայժմ կան նաև ռեզերվներ, կհերիքե՞ն սրանք արդյոք աշխատավարձ ու թոշակ բաժանելուն: Մի կողմ կթողնեն կազմակերպությունների նյութական ծախսերը և ծայրահեղ դեպքում թույլ կտան դրանց բյուջետային ծախսերի չվճարումների գծով ավելացում: Սա է, ինչ կարող է անել Տիգրան Սարգսյանը: Ուրիշ բանի նրա երևակայությունը չի հերիքում: Սրան կհամաձայնի Սերժ Սարգսյանը, անպայման կհամաձայնի: Նրա երևակայությունն էլ ուրիշ բանի չի հերիքում»,- ասաց Հ. Բագրատյանը:
