«Ես կոալիցիայի ներկայացուցիչ լինեմ, թե` ոչ, հասկանում եմ, որ այդ միջոցները մենք արդյունավետ չենք օգտագործում»,- նկատեց Բոստանջյանը` անդրադառնալով այն հարցին, թե ինչքանով է կառավարությունը արդյունավետ օգտագործում արտոնյալ վարկային միջոցները: Այդուամենայնիվ, Բոստանջյանը խուսափեց մեղավորների անուններ նշել և միայն ասաց. «Կան մարդիկ, ովքեր կարողանում են իրենց գործը լավ անել, և կան մարդիկ, ովքեր իրենց գործը լավ չեն անում»:
Բոստանջյանը տեղեկացրեց, որ մշակել է օրենքի նախագիծ` վարկային միջոցների արդյունավետ օգտագործումը վերահսկելու մասին, սակայն այդ օրենքը չի ընդունվել:
«Նոր ժամանակներ» կուսակցության առաջնորդ Արամ Կարապետյանն էլ նշեց, որ Հայաստանի իշխանությունները վարկը սովորաբար վերցնում են այն ժամանակ, երբ կա պատրաստի ծրագիր, և եթե վարկեր վերցնելու կառավարության ծրագիրը դրամի փոխարժեքը կայունացնելն էր, ապա դա խիստ անթույլատրելի է. «Մեր բոլոր վարկերը, որոնք նույնիսկ վերցվել են տնտեսության զարգացման համար, վերջիվերջո տնտեսական որոշակի մեխանիզմներով ուղղված են եղել քաղաքական խնդիրների լուծմանը` որպեսզի երկրում իրավիճակը չհասնի սոցիալական բունտի: Վարկ վերցնողների նպատակը ամենևին էլ չի եղել տնտեսության զարգացումը»:
Բոստանջյանն էլ նկատեց, որ քաղաքականությունն ու տնտեսությունը միմյանց հետ միշտ կապված են և փոխհամաձայնեցված:
