«Բարգավաճ Հայաստան» խմբակցության պատգամավոր Արագած Ախոյանը «Առաջին լրատվական»-ի հետ զրույցում զարմացավ՝ լսելով իր կուսակից մեկ այլ պատգամավորի՝ Վարդան Օսկանյանի այն հայտարարությունը, թե ԲՀԿ-ն պետք է դառնա ընդդիմադիր կուսակցություն: Հիշեցնենք, որ Վ. Օսկանյանն իր ֆեյսբուքյան էջում այսպիսի հայտարարություն էր արել. «Այսօր, հաշվի առնելով երկրում ստեղծված քաղաքական իրավիճակը և առաջիկա տարիներին սպասվող ներքաղաքական հնարավոր զարգացումները և հատկապես այն, որ ԲՀԿ-ն առանց ինքն իրեն ընդդիմադիր հռչակելու՝ այդպիսի դերակատարում է ստանձնել, ես կարծում եմ (սա իմ անձնական տեսակետն է), որ «Բարգավաճ Հայաստանը» խորհրդարանի սեպտեմբերյան նստաշրջանի սկզբում պետք է փոխի իր քաղաքական կարգավիճակը և իրեն հռչակի ընդդիմադիր կուսակցություն: Համոզված եմ, որ դրանից կշահեն երկիրը, քաղաքական համակարգը և վերջիվերջո՝ քաղաքացին»:
Ա. Ախոյանը նախ ասաց, թե ԲՀԿ-ում ընդդիմադիր դառնալու հարց չի քննարկվել, և ինքը չի ուզում «անձնավորված հարցերին պատասխանել»: Այնուամենայնիվ՝ ճի՞շտ կլինի, որ ԲՀԿ-ն սեպտեմբերին էլ այլընտրանքից դառնա ընդդիմադիր կուսակցություն՝ հարցին Վ. Օսկանյանի հայտարարությունից անակնկալի եկած պատգամավորը պատասխանեց. «Ես հիմա չեմ կարող այդ հարցին պատասխանել, ավելի ուշ կարող եմ: Մի քիչ մտածեմ, որովհետև հարցն այնքան հանկարծակի էր: Նորից եմ կրկնում՝ կուսակցությունում նման հարց չի քննարկվել, և ես պատրաստ չեմ պատասխանել: Կարող է դա պարոն Օսկանյանի կարծիքն է, ես չգիտեմ, թե ինչ վերլուծությունների կամ արգումենտների հիման վրա է այդ հայտարարությունն արվել»:
Ա. Ախոյանը երբ անդամակցել է ԲՀԿ-ին և դարձել պատգամավոր, այդ կուսակցությունը կոալիցիայի անդամ էր, այսինքն՝ նա դարձել է իշխանական կուսակցության պատգամավոր: Հետո ԲՀԿ-ն չմիացավ կոալիցիային և իրեն այլընտրանք հայտարարեց: Եթե սեպտեմբերին դառնա ընդդիմադիր, դա կտրուկ փոփոխություն չի՞ լինի պատգամավորի համար, և նա կմնա՞ ԲՀԿ կազմում: Ի պատասխան մեր հարցի՝ Ա. Ախոյանը կուսակցության դիրքորոշման առումով ոչինչ չբացառեց, բայցև ավելացրեց, թե ցանկացած պարագայում՝ ԲՀԿ-ն լինի այլընտրանք, կոալիցիայի անդամ, թե ընդդիմադիր, ինքը հավատարիմ կմնա և կշարունակի մնալ այդ կուսակցության անդամ:
Սակայն, ինչպես գիտենք, մեր երկրում երբ գործարար պաշտոնյան դառնում է ընդդիմադիր, իշխանությունները սկսում են նրա բիզնեսի նկատմամբ հետապնդումներ իրականացնել, նման մտահոգություններ չունի՞ Ա. Ախոյանը. չէ՞ որ ինքն էլ ունի բիզնես-սեփականություն: Ա. Ախոյանի հայտարարագրի համաձայն՝ պատգամավորը «Սպիտակ կամար», «Հայկ արշին» և «Միրոյան Տուֆ» ընկերությունների սեփականատերն է: Վերջին երկու ընկերությունների 100 տոկոս բաժնեմասերը պատկանում են նրան: Ի պատասխան մեր հարցի՝ պատգամավորը պատասխանեց. «Ոչ մի խնդիր չեմ տեսնում, որովհետև… դա թողնենք, էլի: Ես այդքան էլ դրան չեմ հավատում»:
Մեր հիշեցմանը՝ ոչ վաղ անցյալում նույնը տեղի ունեցավ նախկին պատգամավոր Խաչատուր Սուքիասյանի հետ. երբ 2008թ. նա կանգնեց ընդդիմության առաջնորդ Լևոն Տեր-Պետրոսյանի կողքին, հարկային ծառայությունները սկսեցին համատարած ստուգումները նրա օբյեկտներում, իսկ Խ. Սուքիասյանին պատկանող «Բջնի» հանքային ջրերի գործարանը տվեցին այն ժամանակ ՀՀԿ-ական պատգամավոր Ռուբեն Հայրապետյանին, Ա. Ախոյանը արձագանքեց. «Հիշում եմ, բայց չեմ ուզում մեկնաբանել»:
Լուսանկարը՝ PanARMENIAN Photo-ի
