Նիդերլանդների նոր թագավոր Վիլեմ-Ալեքսանդրի թագադրությունը մնացել է առանց հիմնի: Հիմնի հեղինակը հրաժարվել է իր աշխատանքից: Բրիտանա-հոլանդացի կոմպոզիտոր Ջոն Էուբանկը նման որոշում է կայացրել, երբ հոլանդացիները դատապարտել են և´ երաժշտությունը, և´ երգի տեքստը: Այս մասին հայտնում է BBC-ն:
Թագադրության ժամանակ Էուբանկի հիմնը չկատարելու պահանջով առցանց միջնորդությունը ստորագրել է շուրջ 37.8 հազար մարդ:
5 րոպեանոց ստեղծագործությունը սկսվում է հանգիստ նոտայով, սակայն երգչախմբային կատարման պահին վերածվում է ռեփի: Քննադատներից մեկի խոսքով՝ հիմնը գերհագեցած է, իսկ ռեփի հատվածը՝ ուղղակի սարսափելի:
Նրանց դուր չի եկել նաև հիմնի տեքստը, որը հոլանդացիների ցանկությամբ գրել էին 4 հեղինակ: Տարակուսանք էին առաջացրել հատկապես այն տողերը, որտեղ ասվում էր, թե թագավորը մերկ ձեռքերով ամբարտակներ կկառուցի և կպահի ջուրը, կամ քամու ու անձրևի տակ նա կկանգնի նրանց կողքին, կհսկի նրանց քունն ու կպաշտպանի նրանց, քանի դեռ ողջ է: Միջնորդագիրը ստորագրողներից մեկը հայտնել է, որ երգը միապետին վերածում է հանրապետականի, եթե մինչ այդ նա այդպիսին չէր:
Հիմնի ձայնագրմանը մասնակցել է շուրջ 50 կատարող: Նշենք, որ թագադրումը տեղի կունենա ապրիլի 30-ին: Այնուհանդերձ, «թագավորի երգը» միանգամից զբաղեցրել է iTunes-ի հոլանդական հատվածի հիթ շքերթի առաջին շարքերը:
Հիշեցնենք, որ Վիլեմ-Ալեքսանդրի թագադրությունը նշանակվել է այն բանից հետո, երբ նրա մայրը՝ Բեատրիս թագուհին, 2013-ի սկզբին հայտարարել է գահը լքելու մտադրության մասին:
