Բոսթոնի մարաթոնին տեղի ունեցած ահաբեկչության մեջ կասկածվող 19-ամյա Ջոհար Ցարնաևը կոկորդի լուրջ վնասվածք ունի: Հնարավոր է՝ նա չի կարողանում խոսել: Այս մասին հայտնում է CNN հեռուստաալիքը՝ հղում անելով այն հիվանդանոցի բուժանձնակազմին, որտեղ գտնվում է Ցարնաևը:
Ինչպես ավելի վաղ հայտնել էինք, նա մեկ օրվա ընթացքում երկու անգամ ոստիկանության հետ փոխհրաձգության մեջ էր մտել. առաջին անգամ՝ հինգշաբթի լույս ուրբաթ գիշերը, Մասաչուսեթսի տեխնոլոգիական ինստիտուտի տարածքում: Այդ ժամանակ սպանվել էր նրա 26-ամյա եղբայրը՝ Թամերլանը, որի հետ էլ, ենթադրաբար, նա ահաբեկչությունն իրագործել էր մարաթոնի ժամանակ: Զոհվել էր նաև մեկ ոստիկան: Երկրորդ անգամ Ցարնաևը իրավապահների ուղղությամբ կրակ էր բացել ուրբաթ երեկոյան՝ Ուոթերթաունում, երբ ոստիկանությունը փորձել էր ձերբակալել նրան:
