Թուրքական T24 առցանց թերթի փոխանցմամբ՝ Թուրքիայի նախագահ Ռեջեփ Էրդողանը հայտարարել է, որ վերջին 5 տարում Սիրիայից Թուրքիա է գաղթել մոտ 2.5 միլիոն մարդ, և որ իրենք միայնակ են կրել սոցիալական այդ բեռը։
Էրդողանը մատնանշել է, որ սիրիացի փախստականների համար ստեղծել են ճամբարներ, որոնցում ապրում է 280.000 մարդ, և որ իրենք նրանց վրա ծախսել են 8.5 միլիարդ դոլար։ Էրդողանը մանրամասնել է, որ մնացյալ փախստականներն ապրում են քաղաքներում։
Թուրքիայի ղեկավարը Սիրիայի նախագահ Բաշար Ասադի վարչակարգին մեղադրել է «ԴԱԻՇ-ի ու Սիրիայի քրդերի «Դեմոկրատական միություն» կուսակցության (PYD) հետ հարաբերություններ» ունենալու համար: «Ասադը կապերի մեջ է ԴԱԻՇ-ի հետ, ԴԱԻՇ-ից փողով նավթ է գնում։ Անհրաժեշտ է կույր լինել՝ դա չնկատելու համար։
Ասադը կապերի մեջ է նաև PYD-ի հետ։ Երբ Ասադի հետ մեր հարաբերությունները լավ էին, մենք ասում էինք, թե ինչու ինքնություն (քաղաքացիություն) չեք տվել Սիրիայի քրդերին։ Քաղաքացիությո՛ւն տվեք նրանց։ Հիմա գառ են ձևանում»,- ասել է նա։
Հիշեցնենք, որ 2011 թվականի ապրիլի 7-ին (ժողովրդական հուզումների մեկնարկից մոտ մեկ ամիս անց) Բաշար Ասադը քաղաքացիություն շնորհեց երկրի հյուսիսում բնակվող 300.000 քրդի: 1962 թվականի մարդահամարի ժամանակ 120.000 քուրդ դուրս էին մնացել Սիրիայի քաղաքացիների ցանկից և գրեթե կես դար համարվել օտար։
Նավթի գնման հետ կապված՝ Սիրիայում ու Իրաքում ԴԱԻՇ-ի հաղթարշավից հետո թուրք-սիրիական սահմանի երկայնքով կառուցվել են ինքնաշեն հարյուրավոր նավթատար խողովակներ: Այդ խողովակներով նավթը փոխադրվում է Թուրքիա, որից հետո բեռնատարներով հասցվում գնորդներին:
Թուրքիայի հիմնական ընդդիմադիր ուժ «Ժողովրդա-հանրապետական» կուսակցության (ԺՀԿ) նախագահ Քեմալ Քըլըչդարօղլուն մոտ մեկ տարի առաջ Թուրքիայի իշխանություններին մեղադրել էր ԴԱԻՇ-ին աջակցելու համար. «Ամբողջ աշխարհը գիտի, որ ԴԱԻՇ-ին օգնություն եք ցուցաբերում: Փաստարկնե՞ր եք ուզում: Ահա դրանք` զենքերը տեղափոխող վարորդների ու դատախազների հայտարարություններ: ԴԱԻՇ-ի ձեռքում գտնվող զենքն այն զենքն է, որը Ռեջեփ Թայիփ Էրդողանը Դավութօղլուի միջոցով ուղարկել է կազմակերպությանը: Բոլորը գիտեն այս մասին, սակայն մի մտահոգություն ունեն՝ Թուրքիայի քաղաքացիները չիմանան: ԴԱԻՇ-ը օրական 2 միլիոն դոլարի նավթ է ծախում: Ո՞ւմ է ծախում այդ նավթը։ Անկարայում, Ստամբուլում ու Գազիանթեփում գրասենյակներ կան, որոնք ԴԱԻՇ-ի զինյալներ են հավաքագրում»:
