Թուրքական Doğan լրատվական գործակալության փոխանցմամբ, ուսումնական թռիչքի ժամանակ Թուրքիայում ընկել է F-4/2020 տիպի մարտական ինքնաթիռը: Դեպքը տեղի է ունեցել տեղական ժամանակով ժամը 14.15-ին Էսքշեհիրի 1-ին ավիացիոն բազայում:
Ինքնաթիռում գտնվող երկու օդաչուները հասցրել են կատապուլտ անել և փրկվել: Նրանց առողջական վիճակը լավ է:
Նշվում է, որ F-4E Phantom տիպի ինքնաթիռները թուրքական ռազմաօդային ուժերի (ՌՕՈՒ) տրամադրության տակ են հայտնվել 1974 թվականին: Ապա իսրայելական կողմը արդիականացրել է դրանք և վերածել F-4E 2020 Terminatör մոդելի:
Ինքնաթիռի արագությունը 2300 կմ/ժամ է, այն կարող է բարձրանալ մինչև 18.300 մետր և իր վրա կրել մինչև 10 տոննա ընդհանուր քաշով ռումբեր ու հրթիռներ: Ներկայիս դրությամբ, Թուրքիայի ՌՕՈՒ-ում գտնվում են ավելի քան 150 F-4E տիպի մարտական ինքնաթիռներ:
Հիշեցնենք, որ Թուրքիայի ՌՕՈՒ-ն հիմնադրվել է ուղիղ 100 տարի առաջ` 1911 թվականին: 2004 թվականի հունվարի 6-ին Ստամբուլի հայկական «Ագօս» թերթի նախկին խմբագրապետ Հրանտ Դինքը թերթում հրապարակել էր մի հոդված, որում նշել էր, որ Թուրքիայի Հանրապետության հիմնադիր Քեմալ Աթաթուրքի կողմից որդեգրված և հետագայում Թուրքիայի առաջին կին օդաչուն դարձած Սաբիհա Գյոքչենն ազգությամբ հայ է, և որ նրա իրական անունը Հաթուն Սեբիլջիյան է:
Ապրիլի կեսերին էլ Թուրքիայի ՌՕՈՒ հրամանատար, բանակի գեներալ Հասան Աքսայը հայտարարեց, որ տարածաշրջանում ամենահզոր ՌՕՈՒ-ն ունի հենց Թուրքիան, և 25 տարի անց այն կհամալրվի սեփական արտադրության մարտական ինքնաթիռներով:
