«7-ի գործով» փաստաբան Հովիկ Արսենյանը, որպես ՀԱԿ անդամ, պատրաստակամ է Հատուկ քննչական ծառայություններին նյութեր տրամադրել 2008 թ. Մարտի 1-ի դեպքերի վերաբերյալ, սակայն որպես փաստաբան Արսենյանը այլևս չի կարող համագործակցել ՀՔԾ-ի հետ:
Խոսելով Սերժ Սարգսյանի` Մարտի 1-ի դեպքերի վերաբերյալ քրեական գործերին նոր թափ հաղորդելու հանձնարարականի մասին՝ «Առաջին լրատվական»-ի հետ զրույցում Արսենյանը նշեց, որ, ծանոթ լինելով գործընթացին և հարուցված քրեական գործերին, կարող է վստահեցնել, որ անկեղծության դեպքում այդ գործերը շատ հեշտ կբացահայտվեն. «Եթե հանուն պետության անվտանգության, քաղաքացիական հասարակության ստեղծման համար քաղաքական կամք գոյություն ունի, և եթե դա իսկապես դրսևորվի, ապա մեծ ջանքեր պետք չեն, որպեսզի Մարտի 1-ի դեպքերի համար մեղավոր անձինք դատապարտվեն»:
Մարտի 1-ի գործերով նոր դեմքերի ի հայտ գալու հանգամանքին անդրադառնալով՝ Արսենյանը նշեց, որ քննությունը կատարվել է, և մեղավոր պաշտոնատար անձինք բոլորն էլ հայտնի են. «Մասնակի նորություններ կլինեն, բայց ընդհանուր պատկերը պարզ է, և այստեղ քաղաքական կամք է պետք, որպեսզի իսկապես պատժվեն այն մարդիկ, ովքեր իրենց պաշտոնական լիազորությունները չարաշահել են, Սահմանադրությամբ վերապահված նորմերն են խախտել»:
