Թուրքական Cumhuriyet թերթի փոխանցմամբ, վարչապետ Էրդողանը սիրիական զարգացումների կապակցությամբ հատուկ պատվիրակություն է ուղարկելու Սիրիա:
Այս մասին Էրդողանը ասել է. «Բնականաբար, մենք անհանգստացած ենք սիրիական վերջին զարգացումներից: Սիրիայում անհրաժեշտ է մի շարք քայլեր ձեռնարկել: Առավել վաղ ես Սիրիա էի գործուղել իմ հատուկ ներկայացուցչին, այժմ դարձյալ հատուկ ներկայացուցիչներ եմ գործուղելու Սիրիա:
Ամենայն հավանականությամբ, դա կլինի հինգշաբթի օրը, երբ նրանք հանդիպումներ կունենան սիրիական իշխանությունների հետ»:
Հիշեցնենք, որ երեկ թուրքական լրատվամիջոցները տեղեկատվություն տարածեցին, որ մարտի վերջին ամերիկյան Կենտրոնական հետախուզական վարչության (ԿՀՎ) ղեկավար Լեոն Պանետան «հույժ գաղտնի» այցելել է Թուրքիա և Անկարայում հանդիպումներ ունեցել իր թուրք գործընկերների հետ:
Հանդիպման ընթացքում կողմերի քննարկման գլխավոր թեմաներից մեկը եղել է Սիրիայում տիրող իրավիճակը: Կողմերը միահամուռ եկել են այն եզրահանգման, որ Սիրիայում տիրող իրավիճակը մոտեցել է ճգնաժամային սահմանագծի, իսկ այդ երկրում առկա ժողովրդական շարժումը կրում է սուննի բնույթ:
Թուրքական կողմը Սիրիայի վերաբերյալ ներկայացրել է մի շարք առաջարկներ (այսպես կոչված` «Գաղտնի կոդ»), որոնք առնչվում են նաև Սիրիայում իշխանափոխությանը և այդ դեպքում Բաշար Ասադի ընտանիքի անվտանգության երաշխիքներին:
