Երեկ Ուկրաինայի արտաքին գործերի նախարարությունն իր վրդովմունքն է արտահայտել Բելառուսի նախագահ Ալեքսանդր Լուկաշենկոյի հայտարարությունների կապակցությամբ, որը Չեռնոբիլ մեկնելուց հրաժարվելը բացատրել է «Ուկրաինայի ներկայիս իշխանությունների ոջլոտ լինելով»:
«Այդ միջոցառման մեջ չկար և չէր էլ կարող քաղաքականություն լինել: Այդ օրը ցանկացած վեճ կամ փոխադարձ պահանջները նման կլինեին ոսկորների վրա պարի: Էլ ավելի մեծ վրդովմունք են հարուցում Բելառուսի նախագահ Ալեքսանդր Լուկաշենկոյի որոշ հայտարարությունները: Անձնական վիրավորանքներն անթույլատրելի են մարդական շփման ժամանակ: Առավել ևս դրանք անթույլատրելի են, երբ վիրավորանքներն ուղղվում են պետական գործիչներին, որոնք ներկայացնում են ինքնիշխան պետություններ կամ պետությունների միություններ»,- ասված է Ուկրաինայի արտգործնախարարության մեկնաբանության մեջ:
Մենք երեկ տեղեկացրել էինք, որ Ալեքսանդր Լուկաշենկոն իր բացակայությունը Չեռնոբիլի աղետի 25-րդ տարելիցի արարողություններից բացատրել էր «Ուկրաինայի ներկայիս իշխանությունների ոջլոտ լինելով», իսկ Եվրահանձնաժողովի նախագահ Բառոզուին անվանել էր «կազյոլ», քանի որ վերջինս ասել էր, թե չի մեկնի Ուկրաինա այդ միջոցառումներին, եթե այնտեղ ներկա գտնվի Բելառուսի նախագահը: