Օրերս Հայաստան-ԱՄՆ միջխորհրդարանական բարեկամական խմբի հյուրն է եղել Պետդեպարտամենտի Հայաստանի հարցերով պատասխանատու Թեդ Մեսսին: Հանդիպման ընթացքում քննարկվել են Հայաստան-ԱՄՆ հարաբերությունների հետ կապված հարցեր, բայց քանի որ հանդիպումը եղել է փակ, դրա մասին որևէ տեղեկատվություն չի տարածվել: Մինչդեռ հանդիպմանը ներկա գտնվող պատգամավորները վստահեցնում են, որ հանդիպմանը ամենահետաքրքիր մասը եղել է ՀԱԿ խմբակցության ղեկավար Լևոն Զուրաբյանի և «Ազատ դեմոկրատներ» կուսակցության նախագահ Խաչատուր Քոքոբելյանի գաղափարական ընդհարումը:
Լևոն Զուրաբյանը մտածելով, որ Պետդեպարտամենտի ներկայացուցիչը անտեղյակ է, թե Հայաստանի քաղաքական ուժերը ինչ դիրքորոշում ունեն տարբեր արտաքին քաղաքական հարցերի վերաբերյալ, փորձել է այս դեպքում էլ ԱՄՆ-ին տղա բերել Հայաստանի իշխանությունների վրա: Նա հայտարարել է, որ Հայաստանի հիմնական խնդիրը կոռուպցիան է, արդար ընտրական համակարգի բացակայությունը և մոնոպոլիաների գոյությունը տնտեսության մեջ, և առաջարկել է, որ ԱՄՆ իշխանությունները ճնշում գործադրեն Հայաստանի վրա երկրում ժողովրդավարական բարեփոխումներ իրականացնելու համար:
Զուրաբյանի խոսքը շաքարով է կտրել Խաչատուր Քոքոբելյանը և ասել է, որ ինքը թերևս համաձայնվեր Լևոն Զուրաբյանի բնորոշումների հետ, եթե նա չլիներ Եվրասիական տնտեսական միության երդվյալ կողմնակիցներից մեկը, մի միություն, որտեղ նշված արատները համակարգային բնույթ են կրում: Լևոն Զուրաբյանը Քոքոբելյանին անվանել է «ստախոս», ասել է, որ ինքը ԵԱՏՄ-ի երդվյալ նվիրյալ չէ, որ իրենք կողմնակից էին Հայաստանի անդամակցությանը ԵԱՏՄ-ին բացառապես անվտանգության նկատառումներից ելնելով: Քոքոբելյանը, բնականաբար, հիշեցրել է, որ ԵԱՏՄ-ն ռազմաքաղաքական դաշինք չէ, այլ ընդամենը տնտեսական միություն, և որ այդ միության ռուս ներկայացուցիչներն են հայտարարել, որ այդ միությունը չի կարող անվտանգության հետ կապված խնդիրներ լուծել:
Այս բանավեճին բավական հետաքրքիր շտրիխ է ավելացրել Հայաստան-ԱՄՆ միջխորհրդարանական բարեկամական խմբի ղեկավար, ՀՀԿ խմբակցության անդամ Սամվել Նիկոյանը, ով բառացիորեն ասել է հետևյալը. «Ուզում եմ ձեզ ասել, որ ԵԱՏՄ-ին անդամակցելու ընթացքում ընդդիմությունը երկու հանրահավաք կազմակերպեց ի պաշտպանություն Հայաստանի ԵԱՏՄ-ի անդամակցության»:
Նիկոյանը, թերևս, նկատի է ունեցել ՀԱԿ, ԲՀԿ և «Ժառանգություն» եռյակի 2014թ. հոկտեմբերին կազմակերպված հանրահավաքները, որտեղ ՀԱԿ նախագահ Լևոն Տեր-Պետրոսյանը հրապարակայնորեն երդում էր տալիս Ռուսաստանին, որ այդ հանրահավաքները ուղղված չեն Հայաստանի Եվրասիական տնտեսական միության անդամակցությանը: Բացի այդ, նույն Տեր-Պետրոսյանն էր հարթակից համոզում, որ ժողովրդավարական հասարակարգ կարելի է կառուցել նաև ԵԱՏՄ-ի անդամ լինելով:
Բանավեճը բավական թեժ ընթացք է ստացել, այն աստիճան, որ թարգմանչուհի Լիլիթ Օհանյանը փորձել է իր թարգմանությամբ մեղմել գնահատականներն ու մեղադրանքները, սակայն Պետդեպարտամենտի ներկայացուցիչ Թեդ Մեսսին ներկաների համար անսպասելի հայերեն լեզվով հայտարարել է, որ ինքը ամեն ինչ հասկանում է, որ իր կինը հայուհի է, և ինքը տիրապետում է հայերենին: Վերջինս հասկացրել է, որ ինքը բավական տեղեկացված է, թե ինչպիսի դիրքորոշում ունեն Հայաստանի քաղաքական ուժերը տարբեր խնդիրների վերաբերյալ: Մեսսիի հայերեն խոսելուց հետո Լևոն Զուրաբյանն անցել է անգլերենի՝ հիշեցնելով, որ ինքը սովորել է Կոլումբիայի համալսարանում:
Այս հանդիպումից ընդամենը 2-3 օր հետո Լևոն Զուրաբյանը նույնքան վարժ ռուսերենով արդեն դիմում էր Ռուսաստանի Դաշնային խորհրդի նախագահ Վալենտինա Մատվիենկոյին՝ նրան հորդորելով միջամտել Հայաստանի ներքին գործերին, ինչին ի պատասխան Մատվիենկոն ստիպված էր Զուրաբյանին հիշեցնել, որ Հայաստանը անկախ և ինքնիշխան պետություն է:
Զուրաբյանին երևի թվում է, որ եթե ինքը հանդիպում է ԱՄՆ Պետդեպարտամենտի ներկայացուցչի հետ, ապա կարող է ներկայանալ որպես թունդ արևմտամետ, և կարևորելով ԱՄՆ-Հայաստան հարաբերությունները՝ կոչ անել, որ ամերիկացիները ճնշում գործադրեն Հայաստանի իշխանությունների վրա երկրում դեմոկրատական փոփոխություններ իրականացնելու համար՝ մտածելով, որ ամերիկացիները կարող են ուտել իր տված կուտը և ՀԱԿ-ին դիտարկել որպես դաշնակից Հայաստանի ժողովրդավարացման գործում, տեղյակ չլինելով, որ այս կուսակցությունը երդվալ ռուսամետների հավաքատեղի է: Հետո կարող է հանդիպել Ռուսաստանի պաշտոնյաների հետ, մեջբերումներ անել Պուտինից ներկայանալ երդվալ ԵԱՏՄ կողմնակից ու հորդորել, որ Մատվիենկոն ճնշում գործադրի Հայաստանի իշխանությունների վրա սահմանադրական փոփոխություններից հրաժարվելու համար՝ փորձելով հասկացնել, որ Ռուսաստանը պետք է ինչ-որ կերպ սատարի իր նվիրյալ կողմնակիցների պայքարին ընդդեմ սահմանադրական փոփոխությունների:
Ողբերգությունն այն չէ, որ Լևոն Զուրաբյանը ամեն անգամ իր ներկայացրած կուսակցությանը դնում է նման անհեթեթ վիճակներում, ողբերգությունն այն է, որ նա ներկայանում է որպես Հայաստանի խորհրդարանի պատգամավոր: Որովհետև եթե նա պատգամավոր չլիներ, նախ հնարավորություն չէր ունենա հանդիպել այդ մարդկանց, իսկ եթե նման մտքեր էլ արտահայտեր, ապա դրանց վրա որևէ մեկը ոչ մի ուշադրություն չէր դարձնի:
Լուսանկարը` Irakan.info-ի
