Այսօր Կոտայքի մարզի Բուժական համայնքում նախատեսված էր «Նոր Հայաստան« հանրային փրկության ճակատի հավաքը, որը սակայն տեղի չունեցավ։ Նախ միջադեպ տեղի ունեցավ համայքապետարանի աշխատակիցների և համայնքապետի միջև, քանի որ վերջիններս թույլ չտվեցին իրենց շենքի վրա պաստառ փակցնել։ Նրանք դեմ չէին հավաքին, սակայն շենքի վրա պաստառ փակցնելը, համայնքապետի խոսքով, ընտրական օրենսգրքի խախտում է։ Այնուհետև շարժման անդամներից ազատամարտիկ Պավել Մանուկյանը հայտարարեց, թե իրենք հետաձգում են հավաքը, քանի որ այն սկսելու համար հավաքվածներ չկան։ Բացի այդ, գյուղում մարդ է մահացել և իրենք, Մանուկյանի խոսքով, չեն կարող երաժշտություն միացնել ու մարդ հավաքել։
Պավել Մանուկյանը չբացառեց, որ գյուղացիների վրա ճնշումներ են եղել, այդ իսկ պատճառով էլ իրենց հավաքին գյուղացիներից ոչ ոք չկար, բացառությամբ Մանուկյանի մարտական ընկերներից։
Նա հավելեց, որ մարզային մյուս հանդիպումը կրկին լինելու է Բուժական համայնքում։
