ԱԺ ՀՀԿ խմբակցության պատգամավոր, ՀՀԿ փոխնախագահ Ռազմիկ Զոհրաբյանն այսօր հայտարարեց, թե Սերժ Սարգսյանը չի պատրաստվում լուծարել խորհրդարանը, և արտահերթ ընտրությունների անցկացման համար չկա որևէ հիմք: Փոխարենը նա նշեց, որ իշխանության ու ընդդիմության միջև սկսվել է «փոխհասկացվածության» գործընթաց:
Նա հայտարարեց, թե իշխանությունները միշտ էլ պատրաստ են եղել երկխոսության, ավելին, առանց ընդդիմության ներկայացրած պահանջների, գնում են բարեփոխումների: «Մի փուլում կարող է՝ մի քիչ արագ, մի փուլում՝ մի քիչ դանդաղ»,- նշեց նա` հավելելով, որ ընդդիմության պահանջներն ամենևին էլ հայտնագործություններ չէին, և իրենք էլ տեսնում էին առկա խնդիրները:
Ռազմիկ Զոհրաբյանը կարծում է, որ երկխոսությունը պրոցես է: «Ե՛վ իշխանությունների, և՛ ընդդիմության կողմից երբ քաղաքական միջոցառումներ են լինում, ընդհարումներ չկան՝ սա արդեն փոխզիջում է: Սա Մարտի 1 չի արդեն: Գիտեք, որ մարտի 1-ին ծայրահեղ էին տրամադրված, և այդ պատճառով էլ ընդհարումներ եղան»,- նշեց նա:
