Մոսկվայի կառավարությունն ու «Տաշիր» ընկերությունների խումբը ստորագրել են համաձայնագիր ինովացիաների ոլորտում համագործակցության մասին՝ հայտնել են ընկերությունում, փոխանցում է firrma.ru-ն։
Ինչպես հաղորդվում է՝ կողմերը կստեղծեն ենթակառուցվածք բարձր տեխնոլոգիաների ոլորտում նախագծերի ու ընկերությունների հայտնվելու համար և կինտեգրեն մոսկովյան ձեռնարկությունների ինովացիոն լուծումները «Տաշիրի» դուստր կառույցներում։
Ինովացիոն գործունեության աջակցման և զարգացման հետ կապված նախագծերում ներդրումների ենթադրյալ ծավալը մինչ 2020 թվականը կկազմի 10 մլրդ ռուբլի։
Ներդրումների ուղղություններից մեկը կդառնա արդյունաբերական տեխնոպարկի ստեղծումը Մոսկվայի տնտեսության զարգացման համար գերակա ոլորտում։ Տեխնոպարկի ծրագրվող մակերեսը կլինի ավելի քան 10 հազար քառակուսի մետր։
Համաձայն պայմանավորվածությունների՝ «Մոսկվա քաղաքի ինովացիաների գործակալությունը» և «Տաշիրը» խմբի ընթացիկ պորտֆելում կփորձարկեն ինովացիոն նախագծեր։ Հաղորդվում է, որ «Տաշիրի» պորտֆելը ներառում է տնտեսության տարբեր ոլորտներում գործող ավելի քան 200 ընկերություններ և տարբեր նշանակության անշարժ գույքի 50 օբյեկտներ։
Փորձարկումների արդյունքներով՝ նախագիծը կամ լուծումը կառաջարկվեն «Ինովացիաների գործակալությանը»՝ քաղաքում իրագործման համար։
Առաջին համատեղ նախագիծը կդառնա երեխաների համար «Հերոսների քաղաք» ինովացիոն կենտրոնը, որն ուսուցում կառաջարկի 4 ուղղություններով՝ ռոբոտատեխնիկա, դիզայն, ծրագրավորում, մուլտիմեդիա։ Այն ծրագրվում է ստեղծել մինչև 2016 թվականի ավարտը։
