Lenta.ru-ի փոխանցմամբ՝ Turkish Airlines ավիաընկերությունը «Ստամբուլ-Դոնի Ռոստով» չվերթից հանել է 18 ուղևորի, որոնք վախեցել են ունեցած կասկածներից։ Դրա հետևանքով ավիաչվերթը հետաձգվել է մի քանի ժամով։
Ուղևորներից Օլգա Զատոնսկայան հայտարարել է, որ երբ ուղևորներին ավտոբուսով մոտեցրել են ինքնաթիռին, օդանավում արդեն իսկ գտնվել է երեք սևամորթ ուղևորներ՝ երկու տղամարդ և մեկ կին՝ հիջաբով (գլխաշոր), որոնք հապճեպ լքել են օդանավը։
Երբ մնացյալ զբոսաշրջիկները զբաղեցրել են իրենց տեղը, բորտուղեկցորդուհին խնդրել է ստուգել ձեռքի ուղեբեռը և պարզել, թե արդյոք ավելորդ ճամպրուկ չկա՞ օդանավում։ Դրանից հետո ուղևորները սկսել են ցույց տալ անհանգստության նշաններ՝ հիշելով, որ ոչ վաղ անցյալում Թուրքիայում իրականացվել է ահաբեկչություն։
Զբոսաշրջիկներն օդանավի անձնակազմին առաջարկել են ոստիկանություն կանչել՝ օդանավում օտար առարկաներ փնտրելու համար, սակայն մերժում են ստացել։ Turkish Airlines-ի աշխատակիցները հայտարարել են, որ ավիաընկերության այն հաճախորդները, որոնք կլքեն ինքնաթիռը, այլևս չեն կարող հետ վերադառնալ։ Երկար բանակցություններից հետո ուղևորների մի մասը՝ 18 հոգանոց նախաձեռնող խումբը, հասել է նրան, որ իրենց իջեցրել են օդանավից։
Դրանից հետո ոստիկանները մի քանի ժամ ստուգել են ինքնաթիռը, ապա թույլ են տվել, որ ուղևորները բարձրանան օդանավ։ Ընդ որում՝ 18 նախաձեռնողներին թույլ չեն տվել դա անել, և նրանք մնացել են Ստամբուլում։
