Ամեն տարի հոկտեմբերի 28-ին նշվում է Անիմացիայի միջազգային օրը՝ գրում է Calend-ը: Այն հիմնվել է Անիմացիոն ֆիլմի միջազգային ասոցիացիայի ֆրանսիական բաժնի նախաձեռնությամբ 2002-ին՝ ի պատիվ առաջին անիմացիոն տեխնոլոգիայի հրապարակավ ներկայացման 110-ամյակին:
Այդ նշանավոր օրը՝ 1892-ի հոկտեմբերի 28-ին, Փարիզում նկարիչ և գյուտարար Էմիլ Ռեյնոն հանդիսատեսին հրավիրել է նոր՝ մինչ այդ բոլորի համար անհայտ «օպտիկական թատրոն»: Նա առաջին անգամ հրապարակայնորեն ցուցադրել է իր սարքը՝ պրակսինոսկոպը, որը ցույց էր տալիս շարժվող պատկերներ: Այժմ մենք դա կանվանեինք ժամանակակից մուլտֆիլմերի նախատիպի ծնունդ, և հենց այդ օրն է այժմ համարվում անիմացիոն ֆիլմի դարաշրջանի սկիզբ:
