ԵՄ անդամ երկրները, որոնք կապ ունեն, այսպես կոչված, բալկանյան երթուղու հետ, որով ներկայումս ներգաղթյալները ժամանում են միություն, ստեղծել են համակարգման կետեր՝ փախստականների վերաբերյալ տեղեկատվության փոխանակման համար: Այս մասին հայտնում է TASS-ը՝ հղում անելով Եվրահանձնաժողովի մամլո ծառայությանը:
«Բոլոր 12 առաջնորդները՝ ներառյալ Եվրահանձնաժողովի նախագահը (Ժան-Կլոդ Յունկերը), պայմանավորվել են 24 ժամվա ընթացքում կոնտակտային կետեր ստեղծել՝ ամեն օր տեղեկատվություն փոխանակելու և համակարգելու մարդկանց «բալկանյան երթուղով» աստիճանական, վերահսկվող և կարգավորված տեղաշարժը: Մեկ օր անց բոլոր առաջնորդները կատարել են իրենց պարտավորությունները և կոնտակտային կետեր են ստեղծել»,- ասվում է Եվրահանձնաժողովի հայտարարության մեջ:
Հոկտեմբերի 29-ին Եվրահանձնաժողովը կկազմակերպի առաջին տեսակոնֆերանսը համակարգման բոլոր կետերի մասնակցությամբ ձեռք բերված առաջընթացը քննարկելու համար՝ նշել է գերատեսչությունը:
