Վրացական IPN կայքի փոխանցմամբ, Ռուսաստանի արտգործնախարար Սերգեյ Լավրովն այսօր Հարավային Օսիայի նախագահ Էդուարդ Կոկոյտիի հետ կայացած բանակցություններից հետո անդրադարձել է ռուս-վրացական հարաբերություններին.
«Ռուսաստանը չի բացառում, որ Վրաստանը կարող է գնալ նոր ռազմական սադրանքների, քանի որ ներկայումս Թբիլիսիում գործում է այնպիսի ռեժիմ, որից կարել է ակնկալել ամեն ինչ: Դրա համար էլ մենք կձեռնարկենք ամեն ինչ, որպեսզի հուսալիորեն ապահովենք հարավօսական սահմանը, և աչալուրջ կլինենք, եթե ինչ-որ մեկը ցանկանա կրկնել 2008 թվականի օգոստոսյան հանցագործությունը»:
Հիշեցնենք, որ ապրիլի սկզբին Վրաստանի փոխվարչապետ, եվրաինտեգրման հարցերով պետնախարար Գիորգի Բարամիձեն հայտարարել էր, թե Ռուսաստանը շարունակում է Վրաստանին առնչվող ագրեսիվ պլաններ պահպանել, ինչի համար էլ բանակը մշտապես գտնվում է պատրաստի վիճակում.
«Վրաստանում գոյություն ունեն ընդդիմադիր ուժեր, որոնք մտադիր են անկարգություններ ու բախումներ կազմակերպել՝ այն հույսով, որ վերջին պահին Ռուսաստանը կմիջամտի, և նրա զորքերի օգնությամբ կարելի կլինի տապալել վրացական գործող իշխանություններին»:
