«Ինչ-որ մեկի մտնելով ո՛չ ապահով կզգանք, ո՛չ անապահով: Սա մի միջազգային քաղաքական ցուցահանդես է, որ կարծես ինչ-որ լուծման քայլեր են քննարկվում»,- անդրադառնալով Սիրիայում Ռուսաստանի օդուժի և զինվորական ստորաբաժանումների տեղակայմանը՝ «Առաջին լրատվական»-ի հետ զրույցում ասաց Դամասկոսի հայոց թեմի առաջնորդ Տ. Արմաշ եպիսկոպոս Նալբանդյանը։
«Ռուսաստանի միջամտությունն, ըստ երևույթին, միջազգային գետնի վրա որոշ վճռորոշ դեր խաղաց: Պետք է ահաբեկչությունը հաղթահարվի և կայունությունը վերագտնի Սիրիայի երկինքը»,- ասաց սրբազանը:
Նա նշեց, որ Ռուսաստանը կարող է կայունության հաստատման համար մեծ դեր խաղալ:
Ընդհանուր երկրի վիճակը լարված է, բայց տարբեր տեղերում հայերի վիճակը տարբեր է գնահատվում: «Հալեպում և Դամասկոսում իրավիճակը լարված է, կրակոցների ձայներ են գալիս ավելի հաճախ, այնպես որ՝ իրավիճակը լարված է, բայց առօրյա կյանքն իր ընթացքի մեջ է»,- ասաց նա՝ հավելելով, որ այս ամենի ելքը, դժբախտաբար, չի երևում, և խնդիր է, թե ժողովուրդն ինչպես պետք է կարողանա համակերպվել: