Վրացական «Ռեզոնանսի» թերթում հրապարակվել է Էկա Բասիլանիայի «Կովկասի միացյալ նահանգներ` Թբիլիսի մայրաքաղաքո՞վ» խորագրով հոդվածը.
«Միջազգային հանրությունն աշխատում է «Կովկասի միացյալ նահանգների» ստեղծման վրա: Փորձագետների գնահատմամբ, միացյալ Կովկասի գաղափարը պատկանում է Արևմուտքին, որը դրանով ցանկանում է հակադարձլ Մոսկվայի «Նոր ԱՊՀ» նախաձեռնությանը:
Վրաց փորձագետները չեն բացառում, որ Արևմուտքն իսկապես կարող է աշխատանքներ տանել այդ պլանի վրա, քանի որ Հարավային Կովկասի բոլոր հակամարտությունները գտնվում են փակուղային վիճակում: Այդպիսի պլան առաջ քաշելիս Արևմուտքը նպատակ է հետապնդում Ռուսաստանի ազդեցության գոտուց դուրս բերել մի կողմից՝ Հայաստանը, իսկ մյուս կողմից էլ` Ղարաբաղի, Աբխազիայի ու Հարավային Օսիայի հակամարտային գոտիները: Բացի այդ, նոր միավորման շրջանակներում հնարավոր կլինի հասնել այդ հակամարտությունների կարգավորմանը:
Կովկասի խնդիրների գծով վրաց փորձագետ Մամուկա Արեշիձեն կարծում է, որ Ռուսաստանն իր հերթին աշխատանքներ է տանում «Նոր ԱՊՀ» ձևավորելու վրա, որում պետք է ներառված լինեն նաև Աբխազիան ու Հարավային Օսիան: Սակայն հարցականի տակ է այն, թե ռուսական այդ նախաձեռնությանն ինչպիսի մոտեցում կցուցաբերեն ԱՊՀ անդամ երկրները:
Բացի այդ, Ռուսաստանը Բելառուսից պահանջում է ճանաչել Աբխազիայի և Հարվային Օսիայի անկախությունը, ինչի արդյունքում դրանք ավտոմատ կերպ կներառվեն ռուս-բելառուսական գործող դաշինքում:
Արեշիձեի կարծիքով, հենց դրա համար էլ ներկայումս Արևմուտքը շտապում է «Կովկասի միացյալ նահանգների» ստեղծման հարցում: Սակայն քաղաքագետ Ռամազ Սաքվարելիձեն անիրատեսական է համարում այդ գաղափարը, քանի որ դրան խանգարում են Կովկասում առկա հակամարտային գոտիները, ինչպես նաև այն, որ Կովկասի պետությունները բավական տարբեր մոտեցումներ ունեն շատ հարցերում»:
Հիշեցնենք, որ օրեր առաջ ադրբեջանցի քաղաքագետ Վաֆա Գուլուզադեն հայտարարեց, որ Ռուսաստանը մեծապես վախենում է Կովկասը կորցնելուց. «Եթե Ղարաբաղի հարցում համաձայնագիր կնքվի, ապա Ռուսաստանը կկորցնի Հարավային Կովկասում ունեցած ազդեցությունը: Վերջինս կսկսի կողմնորոշվել դեպի Արևմուտք:
Դրա համար էլ Ռուսաստանն ամեն գնով խոչընդոտում է Ղարաբաղի շուրջ բանակցային գործընթացին: Նա միայն պատրանք է ստեղծում, թե իրապես ցանկանում է հասնել դրա կարգավորմանը, և շարունակ հանդիպումներ է կազմակերպում: Ավելին, ես կարող եմ ասել, որ հենց Ռուսաստանն է «հայկական դրոշի տակ օկուպացրել» Ղարաբաղը»:
