Գազայի հատվածում ՀԱՄԱՍ շարժման անվտանգության ուժերը սկսել են ձերբակալել երկար մազերով երիտասարդ պաղեստինցիներին և բռնությամբ ստիպել նրանց մազերը կարճ կտրել: Այս մասին հայտնում է Interfax-ը:
Մարդու իրավունքների պաղեստինյան կենտրոնի ներկայացուցիչները հաստատում են, որ անցած երեք օրերին նման մի քանի դեպքեր են արձանագրվել: «Այդ երիտասարդներին նվաստացուցիչ կերպով ստիպել են կտրել մազերը, իսկ նրանցից մի քանիսին՝ ծեծել: Նրանց ստիպել են նաև հայտարարություն ստորագրել, որում երիտասարդները խոստացել են երբեք մազերը չերկարացնել, տարօրինակ սանրվածքներ չանել և նույնիսկ ցածր գոտկատեղով տաբատներ չկրել»,- գանգատվել են իրավապաշտպանները:
Ոստիկանությունում հաստատել են երիտասարդների սանրվածքի մասին հաղորդագրությունը, սակայն հայտարարել են, որ դա կապված է եղել փողոցում նրանց անպատշաճ վարքի հետ: Տեղի ոստիկանության ներկայացուցիչը հերքել է երիտասարդների նկատմամբ դաժան վերաբերմունքի մասին մեղադրանքները:
