Սեպտեմբերի 30-ից Ռուսաստանը կետային ավիահարվածներ է հասցնում Իսլամական պետության գրոհայինների դիրքերին Սիրիայում: Նախորդ շաբաթ Ռուսաստանի Կասպիական նավատորմի չորս ռազմանավ հրթիռակոծել էին Սիրիայում Իսլամական պետության դիրքերը: Ընդհանուր առմամբ՝ հարվածի համար օգտագործվել է 26 հրթիռ: Հարված է հասցվել 11 թիրախների, նրանք բոլորը ոչնչացվել են: Խոսելով Սիրիայում իրականացված այս ռազմական գործողություններից՝ Պուտինն ասել էր, թե դեռ վաղ է խոսել հաջողությունների մասին և պաշտպանության նախարարին հանձնարարել Սիրիայի ռազմական գործողություններում համագործակցել ԱՄՆ-ի, Թուրքիայի, Սաուդյան Արաբիայի, Իրանի և Իրաքի հետ: ԱՄՆ-ն արձագանքել էր: Պենտագոնի ղեկավար Էշթոն Քարթերը հայտարարել է, որ ԱՄՆ-ը մտադիր չէ Սիրիայում ռազմական գործողությունների վերաբերյալ համագործակցել Ռուսաստանի հետ այնքան ժամանակ, քանի դեռ նա չի փոխել իր սխալ ռազմավարությունը: Ավելի վաղ հայտնի էր դարձել, որ ՆԱՏՕ-ն և ԱՄՆ-ը մտադիր չեն Սիրիայի վերաբերյալ Մոսկվայի հետ հետախուզական տվյալներ փոխանակել, քանի դեռ Ռուսաստանը չի դադարել աջակցել Բաշար Ասադին:
Հայաստանը պաշտոնապես չէր արձագանքել այս իրադարձություններին՝ փորձելով պահել չեզոքությունը: Թեև պաշտոնական արձագանք չկա, բայց Հայաստանում բնակվող սիրիահայերը ոգևորված են ՌԴ-ի գործողություններից: Ավելին՝ կիրակի` հոկտեմբերի 18-ին, Հայաստանում Ռուսաստանի դեսպանատան դիմաց տեղի կունենա երախտագիտության հավաք՝ ի նշան Սիրիայում ձեռնարկած հակաահաբեկչական գործողությունների: Հայաստանում Սիրիայի դեսպանատունն ընդառաջել է Հայաստանի սիրիահայ ուսանողների միության կոչին, Հայաստանում բնակվող սիրիահայերի մասնակցությամբ ռուսական դեսպանատան դիմաց երախտագիտության հավաք անցկացնելու համար:
Երկու ամիս առաջ Հալեպից Հայաստան եկած Նազարեթ Արոյանի կարծիքով ՝ այս փուլում ՌԴ-ի և Սիրիայի ժողովրդի շահերը համընկնում են: Եվ ՌԴ-ի գործողությունները զսպում են իսլամիստ ահաբեկիչներին: Սիրիահայ Լևոն Բաշկարյանի, Վազգեն Տեր-Դավթյանի, Նազա Կույումջյանի դիտարկմամբ էլ՝ սիրիահայերը ոչ թե Պուտինի վարած քաղաքականությանն են վստահում, այլ Բաշար Ասադին, քանի որ հենց նա է դիմել ՌԴ-ի նախագահին:
Սիրիահայերի դիտարկմամբ՝ իրենք նախկինում չեզոքություն են պահպանել՝ոչ ԱՄՆ-ի քաղաքականությունից են խոսել, ոչ էլ ՌԴ-ի, բայց փաստ է, որ Սիրիայում Թուրքիայի, ԱՄՆ-ի, Եվրոպայի գործողությունները ի շահ ժողովրդի չեն:
Սիրիահայերը վստահ են՝ ուժի միջոցով Ասադին հեռացնել չի հաջողվելու, այլ հարց է, եթե գերտերությունները հարցի շուրջ համաձայնության գան: Ի՞նչ պիտի անեն այս պարագայում սիրիահայերը, դժվար է ասել, բայց չեն կարող կորցնել ավելին, քան կորցրել են:
