Հյուսիսային Կորեան «Պունգե-նի» զորակայանում նախապատրաստվում է չորրորդ ստորգետնյա միջուկային փորձարկման: Այդ նույն զորակայանում է տեղի ունեցել երրորդ ատոմային փորձարկումը: Այս մասին հայտնում է ITAR-TASS-ը՝ հղում անելով «Չունան իլբո» թերթին:
Հարավային Կորեայի նախագահին կից ազգային անվտանգության վարչությունում հայտարարել են, որ այս շաբաթվա կեսին Հյուսիսային Կորեան կարող է միջին հեռահարության (մինչև 3000 կմ) հրթիռ արձակել:
Սեուլի կառավարության պաշտոնական ներկայացուցչի հաղորդմամբ՝ իրենք աշխատուժի և ավտոտրանսպորտի աճող ակտիվություն են նկատել զորակայանի հարավային թունելի մոտ: Այդ գործունեությունը նման է երրորդ փորձարկումից առաջ իրականացված աշխատանքներին:
«Մենք տեղեկություն ենք ստացել այն մասին, որ Փխենյանը շուտով կիրականացնի նոր միջուկային փորձարկում: Այժմ մենք վերլուծում ենք իրադրությունը՝ պարզելու, թե դա իրո՞ք այդպես է, թե՞ պարզապես Սեուլի և Վաշինգտոնի վրա ճնշում գործադրելու միջոց»,- բացատրել են Պետխորհրդում:
