Կոտայքի մարզի ընդհանուր իրավասության դատարանում Վաղինակ Մկրտչյանի նախագահությամբ ավարտվել է բռնաբարվելու վերաբերյալ սուտ մատնություն կատարելու համար՝ ՀՀ քրեական օրենսգրքի 333 հոդվածի 2-րդ մասի 1-ին կետով մեղադրվող 19-ամյա աղջկա գործի քննությունը:
Ըստ մեղադրանքի՝ աղջիկը 2014 թվականի հունիսի 30-ին տանը չի գիշերել և այդ հանգամանքն ընտանիքի անդամների մոտ արդարացնելու նպատակով, գիտակցելով, որ իր տրամադրած տեղեկությունը կեղծ է, 2014 թվականի հուլիսի 6-ին, նախազգուշացված լինելով սուտ մատնության համար նախատեսված քրեական պատասխանատվության մասին, հաղորդում է տվել, թե հունիսի 30-ին, ժամը 13-ի սահմաններում Աբովյանի քոլեջներից մեկի մոտից մարզի բնակիչ Շ.-ն ավտոմեքենայով իրեն առևանգել, տարել է Երևան-Սևան ավտոճանապարհի 20 կմ հատվածում գտնվող քարե տնակ, որտեղ իր կամքին հակառակ իր հետ ունեցել է սեռական հարաբերություն:
Ամբաստանյալի նկատմամբ դատաքննության ընթացքում հայտարարվել էր հետախուզում, քանի որ նա համառորեն դատարան չէր ներկայանում, նրա գտնվելու վայրը պարզել հնարավոր չէր լինում:
Հուլիսի 20-ից սկսված հետախուզումն ավարտվել էր աղջկա հայտնաբերմամբ՝ հուլիսի 31-ին:
Գործի կասեցված քննությունը վերսկսվել էր, ամբաստանյալ աղջիկը իրեն մեղավոր էր ճանաչել ու միջնորդել էր գործը քննել արագացված կարգով:
Արդյունքում աղջիկը մեղավոր է ճանաչվել մեղսագրված արարքի համար, դատապարտվել է 3 ամիս ազատազրկման, նրա նկատմամբ պայմանական դատապարտություն է կիրառվել ու սահմանվել է 1 տարի փորձաշրջան:
