Մերձավոր Արևելքում հակամարտությունը կարող է բացասաբար անդրադառնալ Ռուսաստանի և Թուրքիայի տնտեսական հարաբերությունների վրա: Այս մասին գրում է Financial Times-ը:
Ներկայումս Թուրքիան ռուսական գազի խոշորագույն սպառողներից մեկն է: Սև ծովով նոր գազատարի շինարարությունը պետք է ամրապնդեր երկրների գործընկերությունը, սակայն տվյալ պահին այդ տնտեսական հարաբերությունների ապագան հարցականի տակ է՝ գրում է թերթը:
Անցած շաբաթ Թուրքիայի նախագահ Ռեջեփ Թայիփ Էրդողանը զգուշացրել է, որ Սիրիայում Ռուսաստանի ռազմական արշավը վտանգում է Թուրքիայի տարածքում ԱԷԿ-ի կառուցման պայմանագիրը: Նա նաև նշել է, որ Անկարան կարող է սկսել գազ ստանալ այլընտրանքային աղբյուրներից:
Երկրների հարաբերությունները լարվել են, երբ Ռուսաստանի նախագահ Վլադիմիր Պուտինը սկսել է զենք և տեխնիկա ուղարկել՝ հաջակցություն Սիրիայի նախագահ Բաշար Ասադի, որի դեմ հանդես է գալիս Էրդողանը: Իրավիճակը սկսել է վատանալ այս տարվա հոկտեմբերին, երբ Ռուսաստանը խախտել է Թուրքիայի օդային տարածքը՝ այդպիսով առաջացնելով զայրույթի բողոքներ Անկարայում և ՆԱՏՕ-ի դժգոհությունը:
«Երկար ժամանակ նրանք փորձել են այնպես անել, որ Սիրիայի պատճառով վեճը չազդի իրենց երկկողմ տնտեսական հարաբերությունների վրա: Բայց այդ հավասարակշռությունն այլևս կայուն չէ»,- Financial Times-ին ասել է Քարնեգի հիմնադրամի հետազոտող Սինան Ուլգենը:
Պարբերականի տեղեկությամբ՝ այդպիսի «փխրուն» հավասարակշռությունը տարեկան գնահատվում է 32 մլրդ դոլար առևտրաշրջանառությամբ: Ամեն տարի Թուրքիան Ռուսաստանից գնում է 27,4 մլրդ խմ գազ: Բացի դրանից՝ Թուրքիան ռուսական զբոսաշրջության գլխավոր ուղղությունն է: Անցած տարի ռուս զբոսաշրջիկները թուրքական տնտեսությունում ներդրել են 3,7 մլրդ դոլար:
Պարբերականը նշում է, որ երկու կողմերի համար դժվար կլինի հրաժարվել այդքան շահավետ գործընկերությունից:
