ԲՀԿ-ն հայտարարել է՝ եթե Երևանի ավագանու ընտրությունները կեղծվեն, ապա իրենք չեն վերցնի մանդատները: ԲՀԿ-ն Երևանի ավագանիում այսօր ունի մանդատներ, քանի որ 2009 թվականի ընտրություններում երկրորդ տեղը գրավեց:
Այն ժամանակ «Բարգավաճ Հայաստանը» կեղծիքներից չէր խոսում, քանի որ ՀՀԿ-ի հետ կոալիցիայի մեջ էր: Կեղծիքներից խոսում էր ՀԱԿ-ը, որի հետ ԲՀԿ-ն այսօր է չգրված կոալիցիայի մեջ: 2009 թվականին ՀՀԿ-ի հետ կոալիցիա կազմած ԲՀԿ-ն վերցրեց մանդատները, իսկ ՀԱԿ-ը, որ երրորդ տեղն էր գրավել, հրաժարվեց դրանցից: Այդ ամենն ըստ էության կապ չուներ, քանի որ ՀՀԿ-ն միևնույն է՝ վերցրել էր բացարձակ մեծամասնություն և լիովին տնօրինում էր ավագանին: Այսինքն՝ ՀԱԿ-ի քայլը ըստ էության աննկատ մնաց, սակայն գլխավորապես ԲՀԿ-ի պատճառով, քանի որ եթե ԲՀԿ-ն էլ մանդատներից հրաժարվեր, և ՀՀԿ-ն ավագանիում մնար մենակ, դա կարող էր ունենալ որոշակի քաղաքական էֆեկտ: Իհարկե, ՀՀԿ-ին չէր ստիպի մեղա գալ կեղծիքների համար և նոր ընտրություններ նշանակել, սակայն ավագանու նիստերը բոյկոտելու որոշումը շատ ավելի մեծ ռեզոնանս կառաջացներ հասարակության շրջանում, իսկ դա էլ իր հերթին կարող էր այլ իրավիճակ ստեղծել, այլ քայլերի հնարավորություններ բացել: Սակայն ԲՀԿ-ն վերցրեց մանդատներն ու չորս տարի շարունակ ավագանիում աշխատեց ՀՀԿ-ի հետ կողք կողքի՝ անգամ այն բանից հետո, երբ ԲՀԿ-ն կոալիցիա չկազմեց խորհրդարանական ընտրություններից հետո:
Միևնույն է՝ բարեգործությունից մինչև քաղաքականություն ընդդիմադիր կերպարի մեջ մտած ԲՀԿ-ն Երևանի ավագանիում այդպես էլ ոչ մի էական ընդդիմադիր խնդիր չբարձրացրեց քաղաքային ՀՀԿ-ական մեծամասնության առաջ՝ շարունակելով հաստատել գրեթե բոլոր այն որոշումները, որ բերում էր կամ հղանում ՀՀԿ մեծամասնությունը՝ իր քաղաքապետերով: Այսինքն՝ ԲՀԿ-ի մանդատները վերցնելուց Երևանը և երևանցին չեն զգացել որևէ տարբերություն՝ ոչ քաղաքական, ոչ իրավական, ոչ բարոյական տեսանկյունից, քանի որ այդ բոլոր տեսանկյուններից որևէ մեկով անգամ ԲՀԿ-ն չի փորձել հրապարակային դաշտում լրջորեն ընդդիմանալ ՀՀԿ մեծամասնությանը:
Այն, որ ՀՀԿ-ի՝ բացարձակ մեծամասնություն լինելու դեպքում ամեն ինչ անիմաստ կլինի, անհիմն պատճառաբանություն է, որովհետև նույն իրավիճակն է, օրինակ, խորհրդարանական պարագայում, սակայն ԲՀԿ-ն, չնայած դե յուրե անկարող է ազդել բացարձակ մեծամասնության որոշումների վրա, այնուամենայնիվ՝ դե ֆակտո շատ ակտիվորեն փորձում է գոնե բարոյական, հոգեբանական առումով հակադրվել ՀՀԿ բացարձակ մեծամասնությանը: Իսկ Երևանի ավագանու չորս տարվա գործունեության ընթացքում այս ամենի նշույլն անգամ չի եղել:
Եվ երբ այսօր ԲՀԿ-ն հայտարարում է, որ կեղծիքի դեպքում չի վերցնի մանդատները, ապա հասարակության համար սա ոչ մի նշանակություն չունի, քանի որ հասարակությունը տեսել է, թե ինչ է նշանակում, երբ ԲՀԿ-ն վերցնում է մանդատները: Կամ ավելի շուտ՝ դա ոչինչ էլ չի նշանակում: Առաջիկա ընտրություններում առանցքային հարցը մեկն է՝ կվերցնի՞ որևէ մեկը քաղաքապետի պաշտոնը ՀՀԿ-ի ձեռքից, թե՞ ոչ: Իսկ եթե այդ հարցը չի լուծվում, որևէ մեկը չի կարողանում լուծել, ապա դրանից հետո ուրիշ ինչ կվերցնեն կամ չեն վերցնի՝ այլևս ոչ մի արժեք չունի: Վկան 2009 թվականի ընտրություններն են:
