ՆԱՏՕ-ի անդամ երկրների օդաչուներին, որոնք մասնակցում են Իրաքում ԴԱԻՇ-ի դիրքերին հարվածներ հասցնելու գործողություններին, թույլատրվել է պատասխան կրակ բացել ռուսական ռազմական ինքնաթիռների հարձակման դեպքում: Այդ մասին տեղեկացրել է բրիտանական Daily Star Sunday-ը՝ հղում կատարելով Միացյալ Թագավորության պաշտպանության նախարարությանը:
Լրատվամիջոցի տեղեկացմամբ՝ պատասխան կրակ բացելու թույլտվությունը, մասնավորապես, տրված է բրիտանական «Տոռնադո» տիպի ռմբակոծիչներին: Միևնույն ժամանակ, օդաչուներին հրահանգված է ցանկացած գնով խուսափել ռուսական ռմբակոծիչների հետ բախումից:
Այդ որոշումը կայացվել է այն բանից հետո, երբ Լոնդոնը համարել է, որ Մերձավոր Արևելքում իրավիճակը սրվել է Սիրիայում Ռուսաստանի ռազմական գործողությունների պատճառով: «Ոչ ոք չգիտի, թե հետո ինչ կանեն ռուսները: Մենք չգիտենք, թե նրանք ինչպես կարձագանքեն արևմտյան ռմբակոծիչների հետ հանդիպելիս: Երբ ինքնաթիռները թռչում են գերձայնային արագությամբ, օդային տարածքն արագ նեղանում է. հնարավոր է բախում լինի կամ ռուս օդաչուն սխալմամբ խոցվի»,- հայտարարել է աղբյուրը:
