Սիրիայում պետք է հասնել մարտական գործողությունների և սպառազինության մատակարարումների անհապաղ դադարեցման: Այս մասին հայտարարել է ՌԴ նախագահ Վլադիմիր Պուտինը ARD հեռուստառադիոընկերությանը տված հարցազրույցում՝ Գերմանիա կատարելիք այցի նախօրեին: Այս մասին հայտնում է RBK-ն՝ հղում անելով ՌԴ նախագահի մամլո ծառայությանը:
«Մեզ անընդհատ ասում են՝ Ռուսաստանը զենք է մատակարարում Ասադին: Առաջին հերթին՝ գործող լեգիտիմ իշխանությանը զենք մատակարարելու որևէ արգելք գոյություն չունի: Երկրորդ՝ կարծեմ վերջերս New York Times-ն էր հրապարակել, որ Սիրիայի հարակից օդանավակայանների միջոցով միայն վերջին շրջանում ընդդիմությունը ստացել է 3.5 հազար տոննա սպառազինություն: Հենց դա է պետք դադարեցնել»,- ընդգծել է Պուտինը:
ՌԴ նախագահը հիշեցրել է, որ համաձայն միջազգային-իրավական նորմերի՝ զենքի մատակարարումը խմբավորումներին, որոնք ձգտում են ապակայունացնել այս կամ այն երկրի իրադրությունը ռազմական ուղով, անթույլատրելի է: «Դրանք կան, դրանք գործում են, ոչ ոք դրանք չի կասեցրել»,- ասել է Պուտինը:
«Երբ ասում են, որԱսադը կռվում է իր ժողովրդի հետ, իմացեք, որ դա ընդդիմության զինված մասն է: Այն, ինչ տեղի է ունենում, աղետ է: Պետք է վերջ տալ: Պետք է հակամարտող բոլոր կողմերին նստեցնել բանակցային սեղանի շուրջ: Կարծում եմ՝ դա առաջին քայլն է, որ պետք է անել, իսկ քննարկումների ընթացքում մշակել հաջորդը, ինչը մեր տեսանկյունից կարևոր է»,- ասել է նա:
