Ծանր զինատեսակների կիրառումը ղարաբաղյան հակամարտության գոտում, որի հետևանքով երկու կողմից սպանվում ու վիրավորվում են խաղաղ քաղաքացիներ ու զինվորականներ, մեծացնում է ապագայում շատ ավելի լուրջ բախումների հավանականությունը: Այս կարծիքին է ամերիկացի դիվանագետ, գրող, վերլուծաբան Ռիչարդ Կաուզլարիչը:
«Առաջին լրատվական»-ի հետ զրույցում նա շեշտեց, որ խիստ մտահոգված է հետագա էսկալացիայի հնարավորությամբ:
Պատասխանելով մեր հարցին՝ ինչո՞ւ է Ադրբեջանը փորձում սրել իրավիճակը սահմանին, Կաուզլարիչն ասաց. «Կարծում եմ՝ Ադրբեջանը ցուցադրում է իր հիասթափությունն ու Մինսկի խմբի գործընթացի միջոցով իր նպատակներին հասնելու անկարողությունը: Սա սխալ մոտեցում է, որովհետև դիմելով ռազմական գործողությունների՝ նա ավելի է դժվարացնում խնդրի խաղաղ լուծումը: Այնուամենայնիվ՝ թե՛ Հայաստանը, թե՛ Ադրբեջանը պատասխանատու են ուղիղ բանակցելու՝ Մինսկի խմբի միջնորդների ընձեռած հնարավորությունը կորցնելու համար»:
Ռիչարդ Կաուզլարիչը մեկնաբանեց նաև այն տեսակետը, որ լարվածությունը հակամարտության գոտում հրահրում է Ռուսաստանը: Ըստ նրա՝ ոչ Ռուսաստանը, ոչ էլ մեկ այլ արտաքին ուժ չի կարող վերահսկել հայ-ադրբեջանական հնարավոր նոր պատերազմը:
«Եթե պատերազմը սկսվի, ինչպես եղավ 1990-ականների սկզբին՝ շատ դժվար կլինի այն կանգնեցնել: Եվ Հայաստանը, և Ադրբեջանը կցանկանան վերջին բախումների պատասխանատվությունը գցել Ռուսաստանի վրա: Բայց ես չեմ կարծում, որ իրականում այդպես է: Ռուսաստանն առանց այդ էլ խնդիրներ ունի Ուկրաինայում և Սիրիայում, ուստի նրան ձեռնտու չէ անկայունությունը Հարավային Կովկասում»:
Մեր հարցին՝ Սիրիայի հակամարտությունը կարո՞ղ է արդյոք ազդել Լեռնային Ղարաբաղի վրա, Կաուզլարիչը պատասխանեց. «Իհարկե, կարող է: Եթե Ադրբեջանում ու Հայաստանում կարծեն, թե աշխարհը տարված է Սիրիայով, նրանք կարող են օգտագործել հնարավորությունն ու մեծացնել ռազմական լարվածությունը:
Ահա թե ինչու ժամանակն է դադարեցնել կռիվը, թուլացնել հռետորաբանությունը և վերադառնալ Մինսկի խմբի գործընթացին՝ ներառյալ նախագահների միջև դեմ առ դեմ բանակցությունները, լուծելու համար այս հիմնախնդիրը»:
Ռիչարդ Կաուզլարիչն ավելի քան 30 տարի աշխատել է ԱՄՆ-ի դիվանագիտական կորպուսում: 1980-90-ական թվականներին նա զբաղեցրել է Միացյալ Նահանգների պետքարտուղարի օգնականի պաշտոնը: 1994-97թթ. եղել է Ադրբեջանում ԱՄՆ դեսպանը: 2003-2011թթ. ծառայել է ԱՄՆ-ի ազգային հետախուզությունում: Ներկայումս Ջորջ Մեյսոն համալսարանի Էներգետիկ գիտության և քաղաքականության կենտրոնի տնօրենն է, աշխատում է նաև Բրուքինգսի ինստիտուտում:
