ԵՄ դիվանագիտության ղեկավար Քեթրին Էշթոնը և ԵՄ ընդլայնման և եվրոպական հարևանության քաղաքականության հարցերով հանձնակատար Շտեֆան Ֆյուլեն հինգշաբթի օրն իրենց ափսոսանքն են հայտնել Ուկրաինայի նախկին ՆԳ նախարար Յուրի Լուցենկոյի վճռաբեկ բողոքը մերժելու կապակցությամբ՝ կոչ անելով Կիևին փարատել ընտրական արդարադատության նկատմամբ ԵՄ-ի ունեցած մտահոգությունները:
Քաղաքացիական և քրեական գործերով Ուկրաինայի բարձրագույն մասնագիտացված դատարանը չորեքշաբթի օրը մերժել է նախկին նախարարի վճռաբեկ բողոքը, ով ծառայողական պարտականությունները չարաշահելու մեղադրանքով չորս տարվա ազատազրկման է դատապարտվել:
Յուրի Լուցենկոյի նկատմամբ հարուցված երկրորդ գործի քննությունն Ուկրաինայի վճռաբեկ դատարանը նշանակել է ուրբաթ օրը:
Դատարանը հինգշաբթի օրը սկսել է քննել Լուցենկոյի հանդեպ հարուցված երկրորդ գործը, որով նա մեղադրվում է 2004 թ. նախագահի թեկնածու Վիկտոր Յուշչենկոյի թունավորելու վերաբերյալ գործի քննության ժամանակ թույլ տված ծառայողական անփութության մեջ: Այս գործով նրան երկու տարվա ազատազրկում է սպառնում:
Ուկրաինական օրենքների համաձայն՝ առաջին գործով վճիռն, ավելի խիստ լինելով, փակում է երկրորդ գործի վճիռը: Այսպիսով, երկրորդ գործով վճռաբեկ բողոքի քննումը փաստացի ձևական բնույթ է կրում, քանի որ Լուցենկոն ամեն դեպքում բանտում կմնա:
