Երգչուհի Լեդի Գագան հրաժարվել է ելույթ ունենալ 2012թ. օգոստոսին կայացած ԱՄՆ-ի Հանրապետական կուսակցության համագումարին՝ չնայած մեկ միլիոն դոլարին, որը նրան առաջարկվել է որպես հոնորար: Այս մասին հաղորդում է The Washingston Examiner-ը:
Պարբերականի փոխանցմամբ՝ քանթրի-երգչուհի Դոլի Փարթոնը և ռեպեր Փիթբուլը նույնպես հրաժարվել են ելույթ ունենալ համագումարի պատվիրակների համար, որոնք որոշում էին, թե իրենց կուսակցությունից ով է առաջադրվելու ԱՄՆ-ի նախագահի պաշտոնում:
Լեդի Գագային առաջարկված հոնորարն ամենախոշորն է եղել: Բացի խոստացված մեկ միլիոն դոլարից՝ հանրապետականները պարտավորվում էին նաև 150 հազար դոլար փոխանցել կենտրոնին, որն օգնություն է տրամադրում ընտանեկան բռնությունից տուժածներին: Այս բարի կամքի դրսևորումը պետք է տպավորություն թողներ երգչուհու վրա, որը մտահոգված է սոցիալական խնդիրներով:
Դերասանների հետ բանակցությունների մասին տեղեկատվությունն առկա է փաստաթղթերում, որոնք հանրապետականները ներկայացրել են դատարանում իրենց հիմնադրամի՝ American Action Network-ի հայցի քննարկման ընթացքում: Հայցն ուղղված է միջոցառման համերգային մասի կազմակերպիչ Cater America LLC-ի դեմ, որը 350 հազար դոլարի կանխավճար է ստացել կուսակցականների կողմից Lynyrd Skynyrd խմբի ելույթի համար: Ելույթը չի կայացել եղանակային պայմանների պատճառով: Փրոմոութերը պատասխան հայց է պատրաստել, որի համաձայն՝ American Action Network-ը ամբողջությամբ չի վճարել օգոստոսին կայացած համերգի համար:
