ՀՅԴ հայ դատի և քաղաքական հարցերի գրասենյակի տնօրեն Կիրո Մանոյանը կարծում է, որ հայ-թուրքական արձանագրությունները` որպես ճնշող լծակ շարունակում են մնալ: Ըստ նրա` հիմա Թուրքիան սկսել է բավական նուրբ ձևով առաջ տանել Ցեղասպանության մերժման ու ժխտման քաղաքականությունը: Կիրո Մանոյանի խոսքերով, հայ-թուրքական արձանագրությունների գոյությունը շարունակում է նաև հարվածել Ցեղասպանության զոհերի հետնորդների հատուցման խնդրին:
Թուրքիայի կողմից Ցեղասպանության ճանաչումը, ըստ Կիրո Մանոյանի, հնարավոր է արտաքին ճնշումների արդյունքում: Մանոյանը նշեց, որ Թուրքիան մշտապես դրսի ճնշումների արդյունքում է ներքին փոփոխություններ կատարել: Նա նաև օրինակ բերեց ԵՄ-ին անդամագրվելու շուրջ բանակցությունները, որոնց արդյունքում Թուրքիան ստիպված եղավ շատ փոփոխություններ կատարել իր օրենսդրության մեջ:
«Արդյոք Թուրքիան կքաղաքակրթվի՞ այնքան, որ ընդունի Ցեղասպանությունը, իրենք այդ ձգտումն ունեն: Իրենք ասում են` ԵՄ են ցանկանում մտնել: Ու հիմա եթե առանց այդ փոփոխությունների ԵՄ մտնեն, ԵՄ-ի խնդիրը կլինի: Բայց կարծում եմ` առանց արտաքին ճնշումների ներքին փոփոխություններ հնարավոր չէ»,- փաստեց Մանոյանը:
