Հայաստանում այս տարի գազալցակայաններում գազաբալոնների պայթյունների դեպքերի աճ է գրանցվել: Պայթյունների հիմնական պատճառներն են գազաբալոնների մաշվածությունը, սխալ գազաբալոնների օգտագործումը. ավտոմեքենաների մեջ տեղադրվում են այնպիսի գազաբալոններ, որոնք նախատեսված չեն պրոպան տեսակի գազով լիցքավորվելու համար, մ ասնավորապես տեղադրվում են թթվածնային կամ ամոնիակային գազաբալոններ: Հոկտեմբերի 2-ին լրագրողների հետ հանդիպմանը նման հայտարարություն արեց ՀՀ ՏԿԱԻՆ պետական հրդեհային և տեխնիկական անվտանգության տեսչության քարոզչության բաժնի պետ Սերգեյ Հայրապետյանը:
«Գազաբալոնները ժամանակին փորձաքննություն չեն անցնում, եթե փորձաքննություն անցնեն և որևէ անսարքություն լինի, ապա գազաբալոնը կպայթի լաբորատորիայում և ոչ ոք չի տուժի: Նույնիսկ երբ հետաքննություններ անցկացվեցին, պարզվեց, որ սարքերի մեծ մասը տեղադրվել են ոչ թե համապատասխան մասնագիտական հիմնարկներում, այլ ինքնաշեն են: Այս պատճառները գազաբալոնները դարձնում են դանդաղ գործող ռումբ»,- հավելեց նա:
ՏԿԱԻՆ ներկայացուցիչը նշեց նաև, որ իրենք մեքենաների գազաբալոնների հետ կապված որևէ գործառույթ չեն իրականացնում: Նախարարությունը պատասխանատու է միայն գազալցակայանների հրդեհային և տեխնիկական անվտանգության համար:
«Աքիլես» ավտովարորդների իրավունքների պաշտպանության կենտրոն» ՀԿ նախագահ Էդուարդ Հովհաննիսյանը նշեց, որ գազաբալոններն ունեն իրենց ժամկետները: «Յուրաքանչյուր լիցքավորումից գազաբալոնը ներսից մաշվում է: Հիմնականում պայթում են մետաղյա գազաբալոնները, որոնց ժամկետը նախատեսվում է 10 հազարից մինչև 20 հազար անգամ լիցքավորում, իսկ մետաղապլաստե գազաբալոնները, որոնք ավելի որակյալ են, և պայթյուն չեն առաջացնում, այլ միայն ճաքեր են առաջանում, լիցքավորման ժամկետի վերին շեմը հասնում է 50 հազարի»,- ասաց հ/կ նախագահը:
Ապահովագրական ընկերություններից մեկը` հաշվի առնելով գազաբալոնների պայթյունների վերջերս գրանցված աճը, ստեղծել է գազաբալոնների ապահովագրման փաթեթ, որով ավտոմեքենայի գազաբալոնի պայթյունի դեպքում, բացառությամբ ամոնիակային և թթվածնային գազաբալոնների, կփոխհատուցի մինչև 5 մլն դրամի չափով: Ապահովագրական փաթեթի արժեքը 3-5 հազար դրամ է: