Մայրաքաղաքի Աջափնյակ վարչական շրջանի ղեկավար Արտավազդ Սարգսյանը վստահ է, որ աջափնյակցիներն այս տարի առանձնակի ոգևորությամբ կնշեն «Էրեբունի-Երևան»-ը:
Պարոն Սարգսյան, Ձեր ղեկավարած վարչական շրջանն, ըստ էության, մայրաքաղաքի դարպասներից մեկն է ու տոնական Երևանի մասին առաջին տպավորությունները մայրաքաղաքի հյուրերը նաև հենց ձեր վարչական շրջանից են ստանում. Պատրա՞ստ է Աջափնյակը մայրաքաղաքի ծննդյան տոնակատարությանը:
- Միանգամից պատասխանեմ, որ Աջափնյակը, մայրաքաղաքի մյուս բոլոր վարչական շրջանների նման, պատրաստ է տոնակատարությանը: Ընդ որում, ուզում եմ հատկապես նշել, որ պատրաստ է ոչ միայն արտաքին պատշաճ ձևավորմամբ, այլև իսկապես բարձր, ուրախ ու անկեղծ տոնական տրամադրությամբ:
Ձեր խոսքի տողատակում կարծես թե լրացուցիչ խթանող ինչ որ բան կա, որն անկեղծ ուրախանալու լրացուցիչ առիթ է տվել աջափնյակցիներին, այդպե՞ս է:
- Այո, չեք սխալվում: Սրտանց ուրախանալու ու բարձր տրամադրությամբ սիրելի քաղաքի տոնը դիմավորելու լրացուցիչ պատճառ աջափնյակցիներն իսկապես ունեն: Աջափնյակում ապրողների համար գուցե սովորական, բայց որոշ ժամանակ բացակայելուց հետո, Աջափնյակ այցելողների համար վարչական շրջանում կատարված դրական փոփոխություններն ավելի քան ակնհատ ու ակնառու են: Դա վերաբերում է թե՛ վարչական շրջանի մաքրությանը, թե՛ կանաչապատմանն ու ծաղկապատմանը, թե՛ բակերի բարեկարգմանը… Մի խոսքով դրական տեղաշարժ ունենք քաղաքային տնտեսության բոլոր ոլորտներում: Եվ եթե այս ամենին ավելացնենք, որ մինչև տարեվերջ վերջնականապես լուծված կլինի 4-րդ աստիճանի վթարային շենքերի բնակիչների բնակարանով ապահովման հարցը, ապա պարզ կդառանա, որ աջափնյակցին ուրախանալու ու բարձր տրամադրությամբ մեր մայրաքաղաքի ծննդյան օրը նշելու առիթ ունի՛ ու ի սրտե կուրախանա՛:
