ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը սեպտեմբերի 29-ին ընդունել է ՀՀ-ում Իրանի Իսլամական Հանրապետության արտակարգ և լիազոր դեսպան Մոհամմադ Ռեյիսիին, ով ավարտում է իր դիվանագիտական առաքելությունը Հայաստանում: Ինչպես տեղեկացրին ՀՀ ԱԺ հասարակայնության և տեղեկատվության միջոցների հետ կապերի վարչությունից, ողջունելով դեսպանին՝ Արտակ Զաքարյանը բարձր է գնահատել նրա կատարած աշխատանքը խորհրդարանների միջև հարաբերությունները զարգացնելու գործում:
Խոսելով միջխորհրդարանական հարաբերություններից՝ հանձնաժողովի նախագահը կարևորել է Իրանի Մեջլիսի հետ համագործակցության խորացումը, ինչպես նաև ընդգծել խորհրդարանական կապերը նոր մակարդակի հասցնելու անհրաժեշտությունը: Ըստ Արտակ Զաքարյանի՝ ժամանակակից աշխարհում խորհրդարաններն աստիճանաբար ստանձնում են կարևոր դերակատարություն անվտանգության և համագործակցության հարցերում: Արտակ Զաքարյանը հետագա հաջողություններ է մաղթել դեսպանին:
Շնորհակալություն հայտնելով ջերմ խոսքերի և ընդունելության համար՝ ՀՀ-ում Իրանի Իսլամական Հանրապետության դեսպանը ևս կարևորել է երկկողմ հարաբերությունների հետագա զարգացումը, պատգամավորական բարեկամության խմբերի գործունեությունը: Նա գոհունակություն է հայտնել Արտակ Զաքարյանին՝ երկու երկրների խորհրդարանների համագործակցության զարգացմանը նպաստելու և իր պաշտոնավարման տարիներին ցուցաբերած ջերմ վերաբերմունքի համար և հավաստիացրել, որ ինքը միշտ կմնա հայ ժողովրդի բարեկամը:
Հանդիպման ընթացքում անդրադարձ է կատարվել նաև տարածաշրջանային խնդիրներին: Արտակ Զաքարյանը կարևորել է տարածաշրջանային խնդիրների առնչությամբ, մասնավորապես ղարաբաղյան հակամարտության հարցում Իրանի իշխանությունների հավասարակշռված դիրքորոշումը:
