Անցած սեպտեմբերին Երևանի գլխավոր ճարտարապետ Նարեկ Սարգսյանը հայտարարեց, թե մայրաքաղաքում գտնվող 10 կիսակառույցները պետք է ավարտին հասցվեն, և դրանց կառուցապատողներին ծանուցվել է, որ մեկ ամսվա ընթացքում քաղաքապետարանին հստակ ժամանակացույց ներկայացնեն իրենց ծրագրերի վերաբերյալ, թե երբ են սկսում, ինչ ժամկետներում, ինչ նախագծերով և ինչ տևողությամբ: «Եթե ոչ՝ քաղաքապետարանն արդեն պարտադրված կլինի դիմել կառավարություն, որ տարածքները ճանաչվեն հանրային գերակա շահ»,- հայտարարել էր Ն. Սարգսյանը:
Մեկ ամսից անցել է վեց ամիս, սակայն այդ կիսակառույցների հետ կապված դեռ որևէ առաջընթաց չկա: Կիսակառույցներից մեկը գտնվում է Աբովյան 5/5 հասցեում և պատկանում է «Բարգավաճ Հայաստան» կուսակցության ղեկավար Գագիկ Ծառուկյանին: Ավելի կոնկրետ` այդ տարածքը գտնվում է «Երևան» հյուրանոցի անմիջապես դիմացը և երկու ցածրահարկ փոքր շինությունների մեջտեղում: Գ. Ծառուկյանը պլանավորել է իրեն պատկանող մոտ 2000 քմ տարածքում կառուցել «Կեմպինսկի» ապրանքանիշին պատկանող 18-հարկանի հյուրանոցային համալիր:
Աբովյան 5/5 հասցեի կիսակառույցը
Քաղաքապետարանը, սակայն, առաջարկել է հրաժարվել նման բարձրության շենք կառուցելուց` հաշվի առնելով կենտրոնի նոր չափորոշիչները: Ն. Սարգսյանն անցած տարեվերջին հայտարարել էր, թե նախագիծը պետք է փոփոխվի, որից հետո այն կներկայացվի քաղաքաշինական խորհրդի քննարկմանը: Փոխվե՞լ է նախագիծը, այն ներկայացվե՞լ է քաղաքաշինության խորհրդի քննարկմանը` դեռ պարզ չէ: Քաղաքապետարանից պատասխանեցին, որ առաջիկայում բոլոր 10 կիսակառույցների հետ կապված տեղեկատվություն կլինի:
Ծառուկյանի հիշյալ կառույցի շինարարությունը սկսվել է մի քանի տարի առաջ, կառուցվել է ընդամենը 2 հարկ և այդ վիճակում էլ թողնվել է: Աբովյան փողոցից այն պարսպապատվել է, որ աչքի համար այդքան էլ տեսանելի չլինի:
Ընդ որում` շրջակայքի օբյեկտների աշխատողները տեղեկացրեցին, որ կիսակառույցի վերին հատվածում գտնվող «Պասկուչի» սրճարանի 4-հարկանի ապակեպատ շենքն էլ է Գ. Ծառուկյանը գնել, և որ դա էլ պետք է քանդվի ու փոխարենը հսկայական հյուրանոցային համալիր կառուցվի: Այսինքն` Գ. Ծառուկյանը ցանկանում է կառուցապատել Աբովյան փողոցի Թումանյան-Պուշկին հատվածը:
Ասում են՝ Գ.Ծառուկյանը ցանկանում է այս շենքն էլ քանդել ու փոխարենը հյուրանոց կառուցել
Հիշեցնենք, որ այդ կիսակառույցից մի փոքր վեր՝ Թումանյան-Աբովյան խաչմերուկում գտնվող Սպորտի և երիտասարդության նախարարության շենքի մի հատվածը տարիներ առաջ Գ. Ծառուկյանը քանդեց ու բարձրահարկ բնակելի շենք կառուցեց: Իհարկե, մի փոքր հարկաբաժին հատկացրեց նախարարությանը: Հիմա մայրաքաղաքի կենտրոնում գտնվող այդ հատվածը ոչ բարեկարգ է ԲՀԿ ղեկավարին պատկանող կիսակառույցի ու ծրագրերի պատճառով, և դժվար է ասել, թե նա ինչու չի ցանկանում ավարտին հասցնել սկսած շինարարությունը: Անցած տարի, օրինակ, մամուլում հրապարակում եղավ, թե օլիգարխներն ու խոշոր գործարարները, այդ թվում և` Գ. Ծառուկյանը հավաքվել ու որոշում են կայացրել, որ դանդաղեցնեն իրենց բիզնես-գործունեությունը, որպեսզի իշխանությունները հասկական, որ առանց իրենց տնտեսությունը չի կարող զարգանալ, և դրանով խոչընդոտեն կառավարության տնտեսական ծրագրերին:
Ի դեպ, տարիներ առաջ նույն Գ. Ծառուկյանը հսկայական սպորտային համալիրի կառուցում սկսեց Երևանի կենտրոնի մեկ այլ հատվածում՝ Օղակաձև զբոսայգու Խանջյան փողոցին հարող հատվածում: Բայց այդ համալիրի կառուցումն էլ վերջնականապես ավարտված չէ և դեռևս մեկուսացված է շրջակայքից:
Օղակաձև զբոսայգում կառուցված սպորտային համալիրը
Ընդ որում` այս կառույցի համար տարիներ առաջ այգում կտրվեցին բազմաթիվ հաստաբուն ծառեր: Հիմա, փաստորեն, Գ. Ծառուկյանի երկու կիսակառույցներն էլ փչացնում են մայրաքաղաքի կենտրոնական ամենագեղեցիկ փողոցի ու միակ այգու տեսքը, իսկ Երևանի քաղաքապետարանն ի զորու չեղավ Գ. Ծառուկյանին ստիպել ավարտին հասցնել դրանք ու բարելավել այդ հատվածները: Ընդ որում` տեղեկություններ կային, որ այգու մեջ սպորտային համալիրի կառուցապատումը սկսել են առանց համապատասխան թույլտվություն ունենալու: Քաղաքապետարանից խոստացան ավելի ուշ սպորտհամալիրի հետ կապված տեղեկություններ տրամադրել: Այսքանից հետո ԲՀԿ ղեկավարը հայտարարում է, որ Երևանը միայն Աբովյան-Թումանյան խաչմերուկը չէ, և որ Երևանի ղեկավարները ուշադրություն չեն դարձնում քաղաքի այլ հատվածներին:
Ինչ վերաբերում է Ն. Սարգսյանի թվարկած մյուս 9 կիսակառույցներին, ապա քաղաքապետարանից ասացին, որ Սասունցի Դավիթ հրապարակում գտնվող կիսակառույցի քանդման թույլտվությունն արդեն կա: Այդ կառույցը պատկանում է «Բիլդ» ընկերությանը, և դրա տեղում պետք է հյուրանոց ու բազմաֆունկցիոնալ համալիր կառուցվի: Կա նաև Գրիգոր Լուսավորիչ փողոցի վրա գտնվող Թաղման բյուրոյի նախկին շենքի քանդման թույլտվություն, որի տեղում էլ պետք է կառուցվի Բրազիլիայի դեսպանատունը: Քաղաքապետարանից փոխանցեցին նաև, որ առաջիկա օրերին կսկսվեն նախկին «Սևան» հյուրանոցի հատվածում և Արդարադատության նախարարության նախկին այրված շենքի տարածքում շինարարական աշխատանքները: Իսկ մյուս շինությունների, այդ թվում` Գ. Ծառուկյանի կիսակառույցի, Տերյան փողոցի վերջնամասում «Ռեգիոն Ինվեստ» ՍՊԸ 9951.64 քմ տարածքի, նախկին Երիտասարդության պալատի, Կասկադում Գաֆեսճյան կենտրոնի, Հաղթանակ կամրջի մոտ գտնվող «Սասնա Երկիր» ՍՊԸ-ի 9000 քմ տարածքի, Բաղրամյան պողոտայում «Վալենսիա» ՀՁ ՍՊ ընկերության 2750 քմ տարածքի, «Դվին» հյուրանոցի, Ավան` Աճառյան փողոցի մոտ «Ալ Համռա Ռիել Իսթեյթ Դիվելոփմենթ ԼԼՍ» ընկերության 11 հա տարածքի շինարարական աշխատանքները սկսելու և ավարտին հասցնելու ժամկետներն են ճշտվում:
Հիշեցնենք, որ օրերս ԲՀԿ խմբակցության պատգամավոր, Երևանի ավագանու ընտրություններում ԲՀԿ ցուցակը գլխավորող Վարդան Օսկանյանը Facebook-ի իր էջում գրել էր, որ Երևանում կան բազմաթիվ չլուծված խնդիրներ, բացթողումներ, չարաշահումներ, ոչ թափանցիկ գործարքներ և ընթացակարգեր, որոնք բացասական էական ազդեցություն ունեն Երևանի բնակիչների վրա:
Ըստ Օսկանյանի՝ Երևանի նկատմամբ գյուղապետական մոտեցում կա: Դա արտահայտվում է ամեն ինչում՝ հրապարակային միջոցառումներում, շինարարության որակում և քաղաքի զարդարանքներում: Օսկանյանը գտնում է, որ Երևանի նկատմամբ մեր փիլիսոփայական մոտեցումը պետք է փոխենք և քաղաքին վերաբերվենք որպես ոչ միայն Հայաստանի, այլ նաև համայն հայության մայրաքաղաքի և օտարազգի այցելուների համակրելի վայրի: Նման փիլիսոփայությամբ մենք էապես նպաստած կլինենք ոչ միայն քաղաքի տեսքի և որակի փոփոխությանը, այլ նաև բնակչության նույնիսկ ամենատարրական առօրյային վերաբերող խնդիրների արդյունավետ լուծմանը:
Քաղաքի խնդիրները Վարդան Օսկանյանը դիտարկում է չորս հարթություններում.
Առաջինը Երևանի բնակիչների առօրյային վերաբերող հարցերն են՝ ջրամատակարարում, աղբահանություն, տրանսպորտ, կրթություն, առողջապահություն, հաշմանդամություն ունեցող մարդկանց համար հնարավորությունների ստեղծում, կանաչ գոտիներ, ապահով շենքեր և վերելակներ և այլն: Այս բոլոր ոլորտներում էլ լրջագույն խնդիրներ կան, և հաճախ ոչ միայն առաջընթաց չկա, այլև նույնիսկ վատթարացում կա: Սակայն խնդիրն այն է, որ ճիշտ և արդյունավետ կառավարման դեպքում բոլոր խնդիրները լուծելի են:
Երկրորդը քաղաքի ճարտարապետական տեսքն է: Այստեղ միանշանակորեն մենք հետընթաց ունենք: Ապօրինի շինարարություն, շենքերի կտուրների անճաշակ և վտանգավոր ավելացումներ ու կցակառույցներ, ազգայինին անհարիր ճարտարապետական կառույցներ և այլն: Քաղաքապետի առաջին խնդիրը պետք է լինի նախ կասեցնել Երևանի դիմագծի աղճատումն ու աղավաղումը և հետո լրջորեն մտածել վերականգնելու այն, ինչ այս տարիների ընթացքում կորցրել ենք:
Երրորդը քաղապետարանում և թաղապետարաններում բյուրոկրատական քաշքշուկներն են: Այստեղ քաղաքացիների շփումը քաղաքային իշխանությունների հետ պետք է հնարավորինս հեշտացնել, դարձնել թափանցիկ, կրճատել թույլտվություններ ստանալու ընթացակարգերը և այլն:
Վերջապես, Երևան քաղաքում փոխել գործարար մթնոլորտը, բոլոր բիզնեսների համար հավասար պայմաններ ստեղծել մասնակցելու և շահելու քաղաքապետարանի ֆինանսավորմամբ իրականացվող ծրագրերը: Նոր մթնոլորտում մեծացնել քաղաքի ֆինանսական եկամուտների հնարավորությունները և խնդիր դնել Երևանը դարձնել ֆինանսապես լիովին ինքնաբավ:
Այս ամենը հնարավոր կլինի միայն ընտրություններին քաղաքացիների ակտիվ մասնակցությամբ: Սա իսկապես հերթական հնարավորություն է երկրում իրավիճակ փոխելու համար: Պատահական չէ, որ «Բարգավաճ Հայաստանն» իր ընտրարշավի երկու կարգախոս է ընտրել՝ «Փոխելու ենք» և «Սկսենք Երևանից»:
