Իրանը հասանելիություն կստանա իր սառեցված հաշվեհամարներում գտնվող 50 մլրդ դոլարին միջուկային ծրագրի շուրջ համաձայնագրի առանցքային կետերի իրագործումից հետո միայն: Այս մասին Sun-Sentinel պարբերականին հայտնել է ահաբեկչության դեմ պայքարի և ֆինանսական հետախուզման հարցերով ԱՄՆ ֆինանսների փոխնախարարի պարտականությունները կատարող Ադամ Զուբինը:
«Ի հեճուկս որոշ քննադատների պնդումների՝ Իրանը այս պայմանավորվածությունների շրջանակներում չի ստանա 150 մլրդ դոլար՝ որպես «բոնուս»: Նա ոչինչ չի ստանա՝ մինչև չկատարի իր առանցքային պարտականությունները, որից հետո նրան նորից հասանելիություն կտրվի իր սեփական 50 մլրդ դոլարին, որն այժմ կալանքի տակ է Իրանի սահմաններից դուրս»,- պնդում է Զուբինը:
Նա ընդգծել է նաև, որ Իրանն այժմ հսկայական պարտք ունի և լուրջ խնդիրների է բախվում, որոնց լուծման համար պահանջվում է վերոնշյալից «բառացիորեն 10 անգամ շատ գումար»:
