Հավանայում այցով գտնվող Հռոմի պապ Ֆրանցիսկոսը կիրակի պաշտոնական բանակցություններ է վարել Կուբայի առաջնորդ Ռաուլ Կաստրոյի հետ։ Հանդիպմանը քննարկված թեմաների մասին չի հաղորդվում։ Այս մասին հայտնում է RIA Novosti-ն։
Զրույցն ընթացել է «1+1» ձևաչափով Հավանայի Հեղափոխության պալատում, որի դիմացի հրապարակում հովվապետը մի քանի ժամ առաջ պատարագ է մատուցել, որին ներկա է եղել մոտ 300 հազար մարդ։
Բանակցություններից հետո Կուբայի առաջնորդն ու հովվապետը փոխանակվել են նվերներով, որից հետո Հռոմեակաթոլիկ եկեղեցու առաջնորդն ուղևորվել է Հավանայի մայր տաճար՝ երեկոյան պատարագի։
Կիրակի ավելի վաղ հովվապետը հանդիպել էր կուբայական հեղափոխության առաջնորդ Ֆիդել Կաստրոյի հետ։ Վատիկանի տվյալներով՝ հանդիպումն անցել էր ոչ պաշտոնական և ջերմ մթնոլորտում։
Հռոմի պապը առաքելական այցով Կուբա էր ժամանել շաբաթ օրը։ Այցի ընթացքում, որը կտևի մինչ սեպտեմբերի 22-ը, հովվապետը պատարագներ կմատուցի երկրի արևելքի Օլգին և Սանտյագո դե Կուբա քաղաքներում, ինչպես նաև կայցելի կուբացիների սրբավայրեր։
