Թուրքական Hürriyet թերթի փոխանցմամբ՝ Թուրքիայի 11-րդ (2007-2014թթ.) նախագահ Աբդուլլահ Գյուլը NTV հեռուստաալիքի ուղիղ եթերում, ի թիվս այլ հարցերի, անդրադարձել է նաև քաղաքականություն վերադառնալու հնարավորությանը։
Հարցին՝ արդյոք նա կվերադառնա՞ ակտիվ քաղաքականություն, Գյուլը պատասխանել է՝ եթե լինի նման անհրաժեշտություն, ապա անկասկած է, որ կդիտարկի այդ հարցը։ Գյուլն ընդգծել է, որ դա չպետք է լինի ինքնանպատակ։ Նա հիշեցրել է, որ ունեցել է քաղաքական երկար կյանք և միայն վերջին մեկ տարում է, որ ակտիվորեն չի երևացել հասարակության աչքում։
Գյուլը կարևորել է, որ «Արդարություն և զարգացում» կուսակցությունը ամենալավ ձևով պատրաստվի նոյեմբերի 1-ի խորհրդարանական ընտրություններին։
Հիշեցնենք, որ օրեր առաջ Աբդուլլահ Գյուլը չէր մասնակցել ԱԶԿ-ի խոշոր համագումարին, որի ժամանակ Ահմեթ Դավութօղլուն վերընտրվեց ԱԶԿ նախագահի պաշտոնում։
