«ՀԱՊԿ-ը բնականաբար անուղղակի կամ ուղղակի կերպով ներգործություն ունեցել է Հարավային Կովկասում անվտանգության խնդիրների ապահովման գործում. մենք պետք է կարողանանք ո՛չ թերագնահատել, ո՛չ էլ գերագնահատել ՀԱՊԿ-ի դերը մեր արտաքին քաղաքական կյանքում: Հանրապետության նախագահի կողմից արված առաջարկները ժամանակին համահունչ առաջարկներ են, որոնք կարող ենք այս փուլում կիրառական դարձնել Հայաստանի անվտանգության համար»,- «Առաջին լրատվական»-ի հետ հարցազրույցում ասաց Աժ արտաքին հարաբերությունների հանձնաժողովի նախագահ Արտակ Զաքարյանը՝ ի պատասխան այն հարցի, թե ինչպես է գնահատում Սերժ Սարգսյանի այն առաջարկը, որն արվել է Դուշամբեում՝ ՀԱՊԿ-ի գագաթնաժողովի շրջանակներում:
«Քանի գյուղ պետք է ռմբագոծվի, ինչպիսի զենք պետք է օգտագործի Ադրբեջանը, որ ՀԱՊԿ-ը անհանգստանա»: Պատասխանելով այս հարցին՝ Ա. Զաքարյանը նշեց, որ ամեն օր ամեն ժամ մենք խնդիր ունենք անվտանգության հարցը լուծելու. «Խնդիրը, սակայն, ՀԱՊԿ-ի լուծման շրջանակներում չէ. ՀԱՊԿ-ին հրավիրել, կնշանակի զարգացումները դիտարել որես ակտիվ պատերազմական գործողությունների արդյունք»:
Հայաստանի՝ ԵՏՄ-ին անդամակցելուց հետո Ադրբեջանն առավել ինտենսիվությամբ սկսեց ռմբակոծումների ենթարկել Հայաստանի սահմանները: Սակայն, ըստ Ա. Զաքարյանի, Ադրբեջանի գործողությունները պայմանավորված չեն այն հանգամանքով, որ նա մտածում է, թե ՀԱՊԿ-ը չի միջամտի, եթե ինքը ոտնձգություներ կատարի. Ադրբեջանը հայտնվել է մի քաղաքական իրավիճակում, որի համար կարելի է միայն ցավակցել: Բոլորը հասկանում են, որ իր մեղքով՝ հետևողական սխալ և ապակառուցողական գործողության արդյունքում է հայտնվել այդ վիճակում: «Ադրբեջանը ցանկանում է իր վրա ուշադրություն գրավել, շանտաժի ենթարկել ինչպես Հայաստանի, այնպես էլ միջազգային հանրությանը, և խնդիրը տանել ռազմական լուծման ճանապարհ, բայց հստակ գիտակցում է, որ դա իրեն չի հաջողվի»:
Ադրբեջանը նորից զենքի խմբաքանակ է պատվիրել Ռուսաստանին, և Ռուսական զենքից արձակված կրակոցները պետք է հենց ՀԱՊԿ-ի կողմից դիմադրության արժանանան: «Առաջին լրատվական»-ի այս դիտարկման շուրջ Ա. Զաքարյանը նշեց, որ «որևէ միջազգային կազմակերպությունից ռազմական աջակցության ակնկալիք չունենք, ունենք քաղաքական աջակցության կարիք: Քաղաքական այս թնջուկի լուծման հիմնական ճանապարհը միջազգային նորմերն ու սկզբունքներն են: Ադրբեջանը հետևողականորեն խախտում է, և դա ՄԻնսկի խմբի կողմից քննադատվել է, իսկ Ռուսաստանը Մինսկի խմբի անդամ է»:
Եվրամիություն-Ադրբեջան հարաբերության վերաբերյալ հարցին անդրադառնալով Ա. Զաքարյանը նշեց, որ Ադրբեջանի քաղաքական կապիտալը սպառվում է: Եվրոպական խորհրդարանում ձայների ճնշող մեծամասնությամբ Եվրոպան շատ հիմնավորված և փաստերով կարողանում Ադրբեջանին ցույց տալ իր տեղը: «Այսօրվա աշխարհում բոլորը խոսում են խաղաղության անհրաժեշտությունից՝ բացի տեռորիստական կազմակերպություններից ու Ադրբեջանից»,- նշեց Ա. Զաքարյանը:
Հայ-ռուսական հարաբերությունների, ՄԱԿ-ի գլխավոր ասամբլեայում Հայաստանի մասնակցության և այլ մանրամասների մասին կարող եք իմանալ՝ դիտելով տեսանյութը:
Ավելին՝ տեսանյութում:
