Ֆրանսիայում մեծ իրարանցում է սկսվել: Ապրիլի սկզբին Նանտ քաղաքում անհետացել է վեց հոգանոց ընտանիք: Այս մասին հաղորդում է France Presse գործակալությունը: Ծնողների և նրանց չորս երեխաների անհետացման հիմնական վարկածը, ըստ ոստիկանության, առևանգումն ու սպանությունն է: Այս մասին հայտնել է քաղաքի դատախազ Քսավյե Ռոնսենը` նշելով, որ իրենք այդ եզրակացության են եկել այն բանից հետո, երբ անհետացած ընտանիքի տան մոտ հայտնաբերվել է մարդու ոտք:
Ֆրանսիական որոշ լրատվամիջոցներ հաղորդում են, որ տան բակում հայտնաբերվել է մի քանի մարմին: Մինչև ընտանիքի անհետանալը, երեխաների ծնողները տեղի դպրոցի ղեկավարությանը տեղյակ են պահել, որ իրենք տեղափոխվում են Ավստրալիա: Տան հայրն իրեն անվանել է ամերիկյան լրտես` նշելով, որ իրենք տեղափոխվում են «վկաների պաշտպանության ծրագրի շրջանակներում»: Դատախազն այս տեղեկությունը կասկածի տակ է դրել:
