Ադրբեջանական Radioazadlyg.org կայքի փոխանցմամբ, Ադրբեջանը պլանավորել է հունիսին անցկացնել լայնամասշտաբ զորավարժություններ, որոնց ընթացքում առաջին անգամ կցուցադրվի տեղական արտադրության զենքն ու ռազմական տեխնիկան:
Զորավարժությունների ժամանակ իրականացվելու են տեղական արտադրության հրաձգային զենքի, ռեակտիվ կրակային համակարգերի և այլ հրետանային սպառազինության ռեալ կրակոցներ:
Բացի այդ, ի ցույց կդրվեն Ադրբեջանի պաշտպանության նախարարության և Paramount Group ընկերության համատեղ արտադրած տրանսպորտային միջոցների ունակությունները:
Հիշեցնենք, որ այս տարվա մայիսին Ադրբեջանում պլանավորված էր իրականացնել «Տարածաշրջանային պատասխան – 2011» խորագրով ադրբեջանա-ամերիկյան համատեղ զորավարժությունները: Սակայն Ադրբեջանում գտնվող ամերիկյան դեսպանատունը հայտարարեց, որ այդ զորավարժությունները հետաձգվել են անորոշ ժամկետով, և որ այդպիսի խնդրանքով իրենց դիմել է հենց Ադրբեջանի պաշտպանության նախարարությունը:
