«Նաիրիտ» գործարանն այսօրվա դրությամբ իր աշխատողներին պարտք է 8 ամսվա աշխատավարձ: Այս մասին այսօր «Առաջին լրատվական»-ի հետ զրույցում ասաց գործարանի լրատվական ծառայության պատասխանատու Անուշ Հարությունյանը: Նրա խոսքերով՝ վերջին աշխատավարձը տվել են մարտի 7-ին: Հիշեցնենք, որ գործարանի աշխատողները նախագահական նստավայրի մոտ պարբերաբար բողոքի ակցիաներ էին կազմակերպում իրենց աշխատավարձերի համար: Եվ այդ ակցիաներից հետո վճարումը վերսկսվեց:
Ա. Հարությունյանը չկարողացավ հիշել, թե ընդհանուր գումարով աշխատավարձերի որքան պարտք ունի գործարանը, և ընդհանրապես որքան է կազմում «Նաիրիտի» պարտքը: Իսկ այսօր հայտնի դարձավ, որ «Նաիրիտի» ունեցած պարտավորությունների վերաբերյալ ֆինանսների նախարարությունը ստուգումներ է անցկացրել գործարանում, ակտ է կազմել, որի հիման վրա նախապատրաստված նյութերն ուղարկվել են ոստիկանության կազմակերպված հանցավորության դեմ պայքարի վարչություն: Ֆինանսների նախարարությունից մեզ խոստացան ավելի ուշ մանրամասներ տրամադրել, թե ինչ ստուգումներ են անցկացրել և ինչ ակտ են կազմել:
Հայտնի է, որ «Նաիրիտ» գործարանն այժմ չի աշխատում, և աշխատողների մեծ մասը գտնվում են հարկադիր պարապուրդում: Իսկ աշխատավարձի գումարը տրվում է էներգետիկայի նախարարության կողմից, որն էլ իր հերթին դա ստանում է Երևանի ՋԷԿ-ից:
Հիշեցնենք նաև, որ այս պահին «Նաիրիտ գործարանի» 90 տոկոս բաժնեմասը կրկին կառավարման հանձնելու համար էներգետիկայի նախարարությունում մրցույթ է անցկացվում: Նախարար Արմեն Մովսիսյանն անցած շաբաթ ասել էր, թե նոր բաժնետերը հայտնի կդառնա առաջիկա ամսում: