«Ա.Ի.Ալիխանյանի անվան ազգային գիտական լաբորատորիա» պետական ոչ առևտրային կազմակերպությունը, Երևանի պետական համալսարանը և Կալիֆոռնիայի տեխնոլոգիական ինստիտուտը համաձայնագիր են կնքել՝ Երևանում կոսմոլոգիայի և աստղաֆիզիկայի համատեղ լաբորատորիայի ստեղծման մասին:
Համաձայնագիրը կյանքի կոչելու համար կառավարությունն այսօր որոշեց թույլատրել Ա. Ալիխանյանի անվան գիտական լաբորատորիային ստեղծելու հիմնարկներ, մասնաճյուղեր կամ ներկայացուցչություններ:
Էկոնոմիկայի նախարարության ներկայացրած տեղեկանքի համաձայն՝ Կոսմոլոգիայի և աստղաֆիզիկայի ինստիտուտը կարող է դառնալ տարածաշրջանում եզակի գիտական կենտրոն: Ինստիտուտի աշխատանքում առանցքային դեր կունենա կրթական բաղադրիչը, որն արժեքավոր կլինի հաշվողական գիտության և տեղեկատվական տեխնոլոգիաների (հատկապես` գիտական տվյալների վերլուծության նոր եղանակների) ուղղությամբ:
Ինստիտուտը հնարավորություն կունենա գործուն կերպով մասնակցել առնվազն երկու միջազգային ծրագրերի` PLANCK (European Space Agency-NASA, արբանյակն արձակվել է 2009թ. մայիսին, առաջին արդյունքները եղել են 2010թ. գարնանը) և Կալիֆոռնիայի տեխնոլոգիական ինստիտուտի` Meta-Institute for Computational Astrophysics ծրագրերի աշխատանքներին:
