Վրացական Georgia times կայքը, վկայակոչելով իսրայելական IzRus պորտալը, նշում է, որ Աբխազիան ու Իսրայելը կարող են հաստատել ուղիղ ավիահաղորդակցություն: Այս մասին հայտարարել է Աբխազիայի վարչապետի օգնական և խորհրդական Բեսլան Էշբան.
«Աբխազական իշխանությունները մտադիր են տվյալ հարցով դիմել Իսրայելին: Թուրքիայից ու Ռուսաստանից բացի, մեզ համար առաջնահերթ է համարվում Իսրայելի հետ ուղիղ ավիահաղորդակցություն ունենալը:
Մենք նախնականորեն այդ հարցը քննարկել ենք այստեղ ժամանած մեր իսրայելցի գործընկերների հետ:
Ներկայումս աբխազական իշխանություններն արդիականացման աշխատանքներ են իրականացնում Սուխումի օդանավակայանում: Միջազգային վկայական ստանալուց հետո օդանավակայանն իր գործունեությունը կարող է սկսել արդեն 2012 թվականի ամռանը:
Բացի այդ, մենք ակտիվացրել ենք Իսրայելի ռուսալեզու բնակչության հետ մեր շփումները»:
Հիշեցնենք, որ վերջին շրջանում վրաց-իսրայելական հարաբերությունները որոշակի լարվածություն են ապրում: Օրեր առաջ վրաց-իսրայելական «բիզնես պատերազմներին» հավելվեց նաև այն, որ Իսրայելը Վրաստանին ներառեց «սև ցուցակում»` իր քաղաքացիներին խորհուրդ տալով չայցելել Վրաստան:
Ապա հայտնի դարձավ, որ իսրայելական կողմը մտադիր է զենք մատակարարել Աբխազիային և համատեղ զորավարժություններ անցկացնել, թեև պաշտոնական Թել Ավիվը դա չհաստատեց:
