ՀՀԿ փոխնախագահ Ռազմիկ Զոհրաբյանը Րաֆֆի Հովհաննիսյանի՝ վերջին հանրահավաքին Սերժ Սարգսյանին ուղղված առաջարկները նորմալ է գնահատում: Այս առաջարկներով, ըստ նրա, Րաֆֆի Հովհաննիսյանը ճանաչեց Սերժ Սարգսյանի լեգիտիմությունը:
Իսկ թե ինչու մինչ այդ ԱԺ նոր ընտրությունների առաջարկը մերժվեց, Ռազմիկ Զոհրաբյանը նշեց, որ ԱԺ ընտրությունները կայացել են, բոլոր կողմերը ընդունել են այն, և հիմա կարիք չկա գնալ ԱԺ արտահերթ ընտրությունների:
Ըստ նրա՝ Րաֆֆի Հովհաննիսյանին կարող են առաջարկել դերակատարություն ունենալ բարեփոխումների գործում՝ պայքարելով կոռուպցիայի դեմ:
Ավելի վաղ Ռազմիկ Զոհրաբյանը հայտարարել էր, որ սատանիստական երևույթներ է տեսնում ապրիլի 9-ին Ազատության հրապարակում այլընտրանքային երդմնակալություն անցկացնելու մտադրության մեջ:
Այսօր նա անդրադարձավ «իմ դիակի վրայով» Րաֆֆի Հովհաննիսյանի արտահայտությանը: Ըստ նրա՝ դրանք սատանայական ծիսակատարություններ են, նրա կարծիքով՝ որևէ դիակ չի կարող լինել:
Նա անդրադարձավ նաև Երևանի ավագանու առաջիկա ընտրություններին՝ նշելով, որ պայքարը թեժ է լինելու, քանի որ բոլոր ուժերն էլ համարվում են մրցակից:
«Տարոն Մարգարյանը սիրում է քաղաքը, այս օրերին նա ընդամենը 4-5 ժամ է քնում, մնացած ժամանակն աշխատում է»,- ցավով նկատեց Ռազմիկ Զոհրաբյանը:
Անդրադառնալով ստվերային կառավարություն ձևավորելու գաղափարին՝ նա նշեց, որ արդեն իսկ ստվերային բառը իրեն դուր չի գալիս, քանի որ բացասական նրբերանգ է այդտեղ տեսնում, իսկ այն, ինչ խոսվում է Ազատության հրապարակում, ըստ նրա՝ ազատ խոսքի դրսևորումներ են: Ստվերային կառավարությունը, ըստ Ռազմիկ Զոհրաբյանի, նշանակում է խաթարել պետության աշխատանքը, և եթե փորձեն խաթարել պետության աշխատանքը, գործողություններով կարգի են հրավիրելու:
«Առաջին լրատվական»-ի դիտարկմանը՝ փաստորեն նոր Մարտի 1-ի սցենարի կրկնությո՞ւն եք նախատեսում, Ռազմիկ Զոհրաբյանը նկատեց. «Մենք չենք նախատեսում Մարտի մեկի սցենար, բայց եթե ընդդիմությունը զինված պայքարով գնա, բա մենք հո չե՞նք թողնելու պետությունը քանդվի, իշխանափոխություն տեղի ունենա»՝ հավելելով, որ իշխանափոխությունը տեղի է ունենում ընտրությունների միջոցով: Նա նաև հավելեց, որ իրենք թույլ չեն տա ապակայունացնող իրավիճակ ստեղծել հանրապետությունում:
Իսկ ով դիմի գործողությունների, Ռազմիկ Զոհրաբյանը վստահեցնում է՝ իրենք նույնպես կդիմեն գործողությունների և կպատժեն:
Նրա խոսքով՝ հիմա իրենք խնդրում են ընդդիմությանը օգնել իրենց: «Մենք իրավական պետություն ենք կառուցում, որտեղ պետք է հարգել օրենքները»,- ասաց նա, մինչդեռ, ըստ նրա, այլընտրանքային կառավարությունը ենթադրում է հեղափոխական ճանապարհ: