Բրիտանական ոստիկանությունը ռուս ձեռնարկատեր Բորիս Բերեզովսկու մահվան պատճառը համարել է խեղդամահությունը: Ինչպես հաղորդում է The Independent-ը, փորձագետները նման եզրակացության են եկել մարտի 25-ի երեկոյան կատարված դիահերձման արդյունքներով:
Միևնույն ժամանակ պաթոլոգոանատոմները նշել են, որ Բերեզովսկու մարմնի վրա բռնության հետքեր չեն հայտնաբերել: Թերթը հաղորդում է, որ դատաբժշկական փորձաքննությունը դեռևս չի ավարտվել. ենթադրվում է, որ այն կշարունակվի մի քանի օր: Այդ ընթացքում պետք է պատրաստվեն տոքսիկոլոգիական փորձաքննության արդյունքները:
67-ամյա Բերեզովսկու մարմինը հայտնաբերվել էր մարտի 23-ին, անգլիական Բերքշիր կոմսության նրա առանձնատանը: Քննության տվյալներով՝ տանը նրանից և աշխատողից բացի՝ ոչ ոք չի եղել: Վերջինիս վկայություններով՝ ինքը Բերեզովսկուն չի տեսել մարտի 22-ին երեկոյան ժամերից սկսած, իսկ հաջորդ օրը կոտրել է ներսից փակված լոգարանի դուռը, որտեղ հատակին ընկած՝ հայտնաբերել է ձեռնարկատիրոջ մահացած մարմինը: Նա շտապօգնություն է կանչել, սակայն բժիշկները արձանագրել են մահ:
Քիմիական, կենսաբանական և ռադիոլոգիական ստուգումները նրա առանձնատանը չեն հայտնաբերել որևէ վտանգավոր նյութի առկայություն:
Բերեզովսկու մահից անմիջապես հետո ԶԼՄ-ներում հայտնվեց տեղեկություն այն մասին, որ վերջին շրջանում նա տառապել է կլինիկական դեպրեսիայով:
